वीरगंज । रौतहटमा सुटकेसभित्र मृत फेला परेकी महिलाको सनाखत भएको छ। मृतक रौतहटको माधवनारायण नगरपालिका–२ माधवपुर माइत भएकी २६ वर्षीया रुबीकुमारी साह भएको जिल्ला प्रहरी कार्यालय रौतहटका प्रवक्ता डिएसपी राजु कार्कीले जानकारी दिए।
उनका अनुसार मृतक रुबीकुमारी साहको घर भारतको मुजफ्फरपुर हो। ‘प्रारम्भिक अनुसन्धानमा उनी रुबीकुमारी साह रहेको खुलेको छ। उनका आफन्तहरू आएका छन्। थप अनुसन्धान भइरहेको छ,’ डिएसपी कार्कीले भने।
रुबीकुमारी साह एक महिनादेखि माधवपट्टीमा डेरा लिएर बस्दै आएकी थिइन्। उनको एक छोरा रहेको प्रहरीले जनाएको छ। प्रहरीको आशंका अनुसार उनको हत्या गरी शव सुटकेसभित्र राखी सडक किनारमा फालिएको हुनसक्छ।
शनिबार राति करिब साढे १० बजे गौर–सिरसिया सडकखण्डअन्तर्गत गौर नगरपालिका–९ मुडवालगेट नजिकै बेवारिसे अवस्थामा सुटकेस भेटिएको थियो। शंकास्पद देखिएपछि प्रहरीले रातभर निगरानी गरेको थियो।
आज बिहान सुटकेस खोल्दा सल र डोरीले घाँटी बेरिएको अवस्थामा महिलाको शव फेला परेको प्रहरीले जनाएको छ।
