रौतहट । रौतहटको गौर नगरपालिका–९ मुडवलवा गेट नजिकै सडक किनारमा सुटकेशभित्र एक महिलाको शव फेला परेको छ।
शनिबार राति बेवारिसे अवस्थामा डोरीले बाँधिएको सुटकेश भेटिएपछि जिल्ला प्रहरी कार्यालय रौतहटका डिएसपी राजन कार्की नेतृत्वको टोलीले आइतबार बिहान सुटकेश खोलेर हेर्दा अन्दाजी ३० वर्षीया महिलाको शव फेला परेको हो।
डीएसपी कार्कीका अनुसार शवलाई कोचेर राखिएको अवस्थामा भेटिएको हो । महिलाको पहिचान भने खुल्न बाँकी रहेको छ।
प्रहरीले मुचुल्का उठाइसकेपछि शवलाई प्रादेशिक अस्पताल गौरमा पठाइएको छ । घटनाबारे थप अनुसन्धान जारी रहेको प्रहरीले जनाएको छ । यस क्रममा घटनास्थल नजिकै रहेको एक विद्यालयको सीसीटीभी फुटेज पनि जाँच भइरहेको छ।
यो साता मात्रै रौतहटमा तीन वटा शव फेला परिसकेका छन् । यसअघि सप्तरीका उपेन्द्र भगत नेपाल लजमा मृत फेला परेका थिए भने गौर–५ मा सहाबुदिन मियाको छुरा प्रहारबाट हत्या भएको थियो । आइतबार अज्ञात महिलाको शव सुटकेशभित्र भेटिएसँगै जिल्ला आतंकित बनेको छ ।
