वीरगंज । “कोही नभएकोलाई राज्य छ भन्ने भरोसा दिन खोजें” — सरुवा भएका पर्साका प्रमुख जिल्ला अधिकारी (सिडिओ) गणेश अर्यालले आफ्नो कार्यकालको समीक्षा गर्दै यस्तो टिप्पणी गरेका छन्।
शुक्रबार पत्रकार सम्मेलन गर्दै अर्यालले आफूले जनताको सेवा गर्ने प्रयासलाई प्राथमिकतामा राखेको र पर्सामा बिताएको समय स्मरणीय रहेको बताए । उनका अनुसार शीतलहरका समयमा ४८ सय घरपरिवारलाई कम्बल वितरण गरेर राहत पुर्याइएको थियो ।
अर्यालले लामो समयदेखि स्थगित ठाकुर राम बहुमुखी क्याम्पसमा स्ववियु निर्वाचन सम्पन्न गराउन सफल भएको र त्यसले ऐतिहासिक उपलब्धि दिलाएको बताए । उनले भने, “सक्ने जति जनताको सेवा गरेँ, पर्सा जिल्लाको बसाइँ स्मरणीय रहनेछ ।”
जिल्ला प्रशासन कार्यालयमा सेवाग्राहीलाई सहज बनाउन उनले स्थानीय भाषामा सूचना र विभिन्न हेल्प डेस्क स्थापना गरेको जानकारी पनि दिए । भारत–नेपाल सीमा व्यवस्थापनमा सुधार गर्ने योजनाबारे कुरा गर्दै उनले एकीकृत सुरक्षा प्रणाली लागू गर्न चाहेको तर वीरगंज भन्सारको कारणले त्यसलाई कार्यान्वयन गर्न नसकिएको बताए ।
पत्रकारहरुकाे प्रश्वनकाे जवाफ दिदै सिडियाे अर्यालले कानूनले राष्ट्रिय राजमार्ग र सहायक राजमार्गमा कर उठाउने अधिकार स्थानीय तहलाई नदिएकाे वताए ।
अर्यालले आफूले सुरु गरेका पहलहरूले पर्सामा प्रशासनिक सुधार, जनसेवा र शैक्षिक क्षेत्रमा महत्वपूर्ण योगदान पुर्याएको दाबी गर्दै पर्सावासीको सहयोग र साथप्रति आभार व्यक्त गरेका छन् ।
