सेढवा । पर्साको ग्रामीण भेगमा धानबालीका लागि अत्यावश्यक मानिने रासायनिक मल यूरियाको अभाव गहिरिँदै गएको छ। रोपाइँपछिको दोस्रो पटक छर्ने मल अभावका कारण किसानहरु चिन्तित बनेका छन्।
स्थानीय कृषि सहकारीमार्फत कृषि सामग्री कम्पनी लिमिटेड र साल्ट ट्रेडिङ्ग कम्पनी लिमिटेडले नेपाल सरकारको अनुदानमा मल वितरण गर्दै आएका छन्। तर, आपूर्ति आवश्यकताभन्दा निकै कम भएको किसानहरुले गुनासो गरेका छन्।
जिराभवानी गाउँपालिका–३ नौकाटोलाका किसान शंकर चौधरीले हजारौँ रुपैयाँ खर्च गरेर दुईपटक सिँचाइ गरे पनि मल अभावकै कारण धानमा हाल्न नसकेको बताए। उनले भने, “सिँचाइ गरेको पानी सुकिसकेको छ, मल नहुँदा बालीको विकास नै रोकिएको छ, यसरी उत्पादन घट्ने पक्का छ।”
किसान बिरेन्द्र दहितले पनि पाँच बिघा जमिनमा लगाएको धानमा २५ किलो यूरिया मात्र पाएको बताए। “२५ किलोले केही पनि हुँदैन,” उनले गुनासो गरे।
यता, भारतको सीमावर्ती बजार भंगहा, धुमाटाड जसौली, इनरवा, मैनाटाड, सिकटा, भेलाही लगायतका क्षेत्रमा समेत यूरियाको आपूर्ति घट्दा नेपाली किसान प्रभावित भएका छन्। बिहार सरकारले भारतीय नागरिकलाई मात्र ४२० रुपैयाँमा यूरिया उपलब्ध गराए पनि गैर–भारतीयले नपाउने र सीमा हुँदै आयात पनि घटेका कारण समस्या थपिएको छ।
अभावसँगै कालाबाजारी पनि चुलिएको किसानको आरोप छ। कृषि सहकारीका संचालक र आपूर्तिकर्ता बीचको मिलेमतोमा अनुदानित मल बीचमै बिक्री गरेर किसानलाई कम मात्रामा वितरण गर्ने गरिएको उनीहरुको आरोप छ।
जिराभवानी गाउँपालिका–१ मा हाल नेपाली यूरिया मल प्रति बोरा रु. २२०० र भारतीय मल रु. २००० मा बिक्री भइरहेको किसानहरुले जानकारी दिएका छन्।
