वीरगंज । जनता समाजवादी पार्टी (जसपा), नेपालले २०६३ साल चैत्र ७ गते रौतहटको गौरमा भएको घटनाबारे सर्वोच्च अदालतले दिएको परमादेश सम्बन्धी समाचारप्रति आपत्ति जनाउँदै भ्रामक समाचार सम्प्रेषण नगर्न सञ्चारमाध्यमलाई आग्रह गरेको छ।
जसपा नेपालको केन्द्रीय कार्यालय, बालकुमारी ललितपुरबाट बुधबार जारी गरिएको प्रेस विज्ञप्तिमा सर्वोच्च अदालतले दिएको आदेशको पूर्णपाठ वा संक्षिप्त आदेश नै नआउँदै अध्यक्ष उपेन्द्र यादवलाई लक्षित गरी समाचार सम्प्रेषण गर्नु पूर्वाग्रही, भ्रामक र सस्तो लोकप्रियताका लागि नियतवश गरिएको भन्दै आपत्ति जनाइएको छ।
विज्ञप्तिमा गौर घटनाको विषयमा तत्कालीन सरकारले उच्च स्तरीय न्यायिक छानबिन समिति गठन गरी सत्य तथ्य अभिलेखीकरण गरिसकेको र राष्ट्रिय मानव अधिकार आयोग तथा संयुक्त राष्ट्र संघीय मिशन (UNMIN) ले समेत अनुसन्धान प्रतिवेदन सार्वजनिक गरिसकेको उल्लेख छ । साथै यो विषय राजनीतिक समाधानको बाटोबाट अघि बढाइनुपर्नेमा सर्वोच्च अदालतको आदेशलाई अपुष्ट समाचारमार्फत अतिरञ्जित रुपमा प्रस्तुत गर्नु गलत भएको जसपाको भनाइ छ।
प्रवक्ता मनिष कुमार सुमनले हस्ताक्षर गरेको विज्ञप्तिमा पार्टी अध्यक्ष उपेन्द्र यादव र जसपा सदैव सर्वोच्च अदालतको आदेशप्रति सहयोगी रहँदै आएको उल्लेख गर्दै, अदालतको आदेशको प्रतिक्षा गर्न तथा भ्रामक समाचारमा विश्वास नगर्न, त्यस्तो गतिविधिमा सरिक समेत नहुन आम नागरिक, शुभेच्छुक र कार्यकर्ताहरूलाई अपिल गरिएको छ।
विज्ञप्तिमा अन्त्यमा न्याय र मधेश आन्दोलनको पक्षमा पार्टी निरन्तर प्रतिबद्ध रहेको दोहोर्याइएको छ ।
