जनकपुरधाम । लोकतन्त्र, कानुनी शासन र अभिव्यक्ति स्वतन्त्रताको पक्षधर दुई प्रतिष्ठित संस्था नेपाल बार एसोसिएशन, जनकपुरधाम र नेपाल पत्रकार महासंघ, मधेश प्रदेशबीच उत्पन्न विवाद ऐतिहासिक सहमतिका साथ समाधान भएको छ ।
दुवै संस्थाबीच उच्चस्तरीय वार्ता समितिको प्रयास र सफल मध्यस्थतापछि विगतमा देखिएको मतभेद र असमझदारी अन्त्य गर्दै विवाद शान्तिपूर्ण ढंगले टुंगिएको हो ।
सहमति अनुसार, जनकपुरधामस्थित सार्वजनिक जग्गा सम्बन्धी प्रकरणमा दुवै संस्थाले भविष्यमा आपसी सहयोग र समन्वयमार्फत अगाडि बढ्ने प्रतिबद्धता जनाएका छन् । साथै, नेपाल पत्रकार महासंघ मधेश प्रदेश अध्यक्ष श्यामप्रसाद बन्जारा र नेपाल बार एसोसिएशन जनकपुरधाम अध्यक्ष अधिवक्ता बिष्णुकुमार मिश्रले सहमतिपत्रमा हस्ताक्षर गर्दै विवादलाई समाधान गर्ने सहमति जनाएका हुन् ।
सम्झौतापछि दुवै संस्थाले विगतका घटनाबाट दुःख व्यक्त गर्दै आपसी विश्वास, सद्भाव र सहकार्यका आधारमा लोकतान्त्रिक मूल्य मान्यताको संरक्षण गर्ने प्रतिवद्धता सार्वजनिक गरेका छन् ।
यस सहमतिलाई दुवै संस्थाले लोकतान्त्रिक परिपाटी, कानुनी शासन र सामाजिक न्यायलाई सुदृढ बनाउन ठूलो उदाहरणका रूपमा लिएको बताएका छन् ।
