वीरगंज । जनता समाजवादी पार्टी (जसपा) नेपालका नेता–कार्यकर्ताले आफ्ना अध्यक्ष उपेन्द्र यादवलाई फसाउन षडयन्त्र गरिएको भन्दै सोमबार साँझ धनुषाकाे जनकपुरसहित विभिन्न जिल्लामा प्रदर्शन गरेका छन्।
१९ वर्षअघि रौतहटको गौरमा भएको हत्याकाण्डको छानबिन गर्न सर्वोच्च अदालतले परमादेश दिएपछि जसपा निकट कार्यकर्ताहरू आक्रोशित बनेका हुन्। उनीहरूले जनकपुरधामको रामानन्द चोकमा टायर बालेर ‘उपेन्द्र यादवविरुद्धको षडयन्त्र बन्द गर, षडयन्त्रकारी होसियार’ जस्ता नारासहित प्रदर्शन गरेका थिए।
जसपा नेपालका मधेस प्रदेशका प्रमुख सचेतक रामआशिष यादवले सर्वोच्चको परमादेश फिर्ता नभए कडा आन्दोलनमा उत्रिने चेतावनी दिएका छन्। उनले कांग्रेस–एमाले गठबन्धनले पहिचानवादी शक्तिलाई कमजोर बनाउन षडयन्त्र गरिरहेको आरोप लगाए।
त्यस्तै, जसपा नेपाल धनुषाका अध्यक्ष पशुपति यादवले भूमी अध्यादेश पारित नगर्दा अध्यक्ष उपेन्द्र यादवविरुद्ध षडयन्त्र गरिएको दाबी गर्दै तत्काल सांकेतिक विरोधका साथै थप संघर्षका कार्यक्रम अघि सारिने बताए।
सोमबार नै जसपा निकट समाजवादी युवा संघ पर्साले वीरगन्जको घण्टाघर चोकमा पनि टायर बालेर प्रदर्शन गरेको थियो। उनीहरूले सर्वोच्च अदालतले गौर घटनामा दिएको परमादेश अन्यायपूर्ण भएको भन्दै सडकमा उत्रिएको बताएका छन्।
गौर हत्याकाण्डको अनुसन्धान अघि बढाउन सर्वोच्च अदालतले न्यायाधीशद्वय तिलप्रसाद श्रेष्ठ र नित्यानन्द पाण्डेको इजलासमार्फत सोमबार परमादेश दिएको हो।
