वीरगंज । वीरगंजस्थित भारतीय महावाणिज्य दूतावासले शुक्रबार ७९औँ भारतीय स्वतन्त्रता दिवस विशेष कार्यक्रमका साथ धूमधामपूर्वक मनाएको छ। प्रत्येक वर्षझैं यस वर्ष पनि अगस्ट १५ का दिन दूतावास प्राङ्गणमा विविध सांस्कृतिक प्रस्तुति, देशभक्तिपूर्ण गीत तथा नृत्यका माध्यमबाट कार्यक्रम सम्पन्न गरिएको हो।
कार्यक्रमका प्रमुख आकर्षण भारतीय महावाणिज्यदूत देवी सहाय मिणाले राष्ट्रिय झन्डा फहराउँदै देशभक्ति र एकताको सन्देश दिए । आफ्नो सम्बोधनमा उनले भारत–नेपालबीचको ऐतिहासिक, सांस्कृतिक र आर्थिक सम्बन्धलाई अझ मजबुत बनाउँदै साझेदारीमा अघि बढ्ने प्रतिबद्धता व्यक्त गरे ।
सांस्कृतिक प्रस्तुतिहरूले भारतीय स्वतन्त्रता दिवसको ऐतिहासिक महत्त्वलाई उजागर गरेका थिए। कार्यक्रममा वीरगंजस्थित भारतीय समुदायका साथै स्थानीय नेपाली नागरिकहरूको समेत उत्साहजनक सहभागिता रहेको थियो।
यस अवसरमा महावाणिज्य दूतावासका अधिकारी, कर्मचारी, व्यापारी, विद्यार्थी तथा विभिन्न सामाजिक क्षेत्रका प्रतिनिधिहरू उपस्थित थिए। सहभागीहरूले भारत–नेपालको मैत्री सम्बन्धलाई अझ सुदृढ बनाउने विषयमा ऐक्यबद्धता व्यक्त गरेका थिए।
