रक्सौल । भारतको पश्चिम चम्पारणका तीन व्यक्तिबाट एक नाबालिग युवतीलाई उद्धार गरिएको छ। युवतीलाई वैदेशिक तस्करी गर्ने उद्देश्यले नेपालतर्फ लैजाने क्रममा रक्सौल नजिक पक्राउ गरिएको हो।
सूचनाका आधारमा सशस्त्र सीमा बल (SSB) को मानव तस्करी विरोधी इकाई (AHTU) ले प्रयास juvenile aid center, पूर्वी चम्पारण र स्वच्छ रक्सौल (एनजीओ) सँगको सहकार्यमा खोज तथा अनुसन्धान अभियान सञ्चालन गरेको थियो।
मैत्री पुल, रक्सौल नजिक भारतबाट नेपालतर्फ गइरहेका पश्चिम चम्पारणका मोहम्मद फरहान, मोहम्मद राजा आलम र मोहम्मद नजरेन आलमलाई युवतीसहित नियन्त्रणमा लिइएको हो। प्रारम्भिक अनुसन्धानमा युवतीलाई सामाजिक सञ्जालमार्फत मोहम्मद फरहानले प्रेमजालमा फसाई विवाहको प्रलोभन देखाएर घरपरिवारलाई नबताई नेपालतर्फ ल्याइएको खुलेको छ।
तस्करहरूले युवतीलाई हाजीपुरबाट रक्सौल ल्याई पहिलो चरणमा बीरगञ्जको होटलमा राख्ने र दुई दिनपछि पोखरा हुँदै देहरादून (भारत) लैजाने योजना बनाएको खुलेको छ। युवतीको परिवारले गुमशुदगीको उजुरी भारतको पटना स्थित रामकृष्ण नगर प्रहरीमा दर्ता गराएको थियो।
उद्धारपछि नाबालिग युवती र तीनै जना तस्करलाई थप कारबाहीका लागि पूर्वी चम्पारण, बिहारको हरैया प्रहरी चौकीमा बुझाइएको छ।
रेस्क्यु अभियानमा AHTU र SSB बाट निरीक्षक विकास कुमार, स.उ.नि. खेमराज, हवल्दार अरविन्द द्विवेदी, महिला प्रहरी नीतू कुमार, सेतू लक्ष्मी, प्रयासबाट आरती कुमारी, राज गुप्ता र स्वच्छ रक्सौलका रणजीत सिंह, साबरा खातुन सहभागी थिए।
