वीरगंज । नेशनल मेडिकल कलेज तथा शिक्षण अस्पताल, बीरगंजको आयोजनामा र बारागढी गाउँपालिका, खोपवाको सहकार्यमा शुक्रबार एक दिवसीय निःशुल्क स्वास्थ्य परीक्षण तथा रक्तदान कार्यक्रम सम्पन्न भएको छ।
बारागढी गाउँपालिकाकाे खाेपवास्थित बर्थिङ सेन्टरमा भएकाे कार्यक्रममा नेशनल मेडिकल कलेजका वरिष्ठ फिजिसियन डा. सुधाकर झा, बालरोग विशेषज्ञ डा. रञ्जित कुमार चौरसिया र स्त्री रोग विशेषज्ञ डा. सन्तोष झा लगायतका चिकित्सकहरूले स्वास्थ्य परीक्षण गरेका थिए । उपचारमा आएका सबैलाई निःशुल्क औषधि समेत वितरण गरिएको थियो। कार्यक्रममा कुल २६३ जना बिरामीहरूको स्वास्थ्य परीक्षण गरिनुका साथै ५७ जना स्वयंसेवकहरूले रक्तदान गरेका थिए।
नेशनल मेडिकल कलेजको तर्फबाट अस्पताल निर्देशक डा. इसरत जहान अन्सारी, प्रमुख सूचना अधिकृत ई. प्रदीप चौधरी, मार्केटिङ म्यानेजर जितेश चन्द्र दास, गुणस्तर तथा सञ्चालन प्रमुख ब्रज किशोर चौधरी, म्याट्रोन विकास कुमार र रक्त बैंक कार्यक्रम संयोजक बिनेश चौधरी लगायतको उपस्थिति रहेको थियो।
त्यस्तै गाउँपालिकाको तर्फबाट नगर प्रमुख अशोक कुमार जयसवाल, स्वास्थ्य सचिव ओमप्रकाश चौधरी, प्रसूति केन्द्र प्रमुख तथा अन्य पदाधिकारीहरूको सक्रिय सहभागिता रहेको थियो।
कार्यक्रमको विशेष क्षणमा नगर प्रमुख जयसवालले अस्पताल निर्देशक डा. इसरत जहान अन्सारीलाई मायाको चिनो प्रदान गर्नुका साथै सहभागी सम्पूर्ण चिकित्सक, अधिकारी तथा कर्मचारीलाई सम्मानपत्र वितरण गरेका थिए।
आयोजक पक्षका अनुसार यस प्रकारको संयुक्त प्रयासले समुदायस्तरमा स्वास्थ्य सेवाको पहुँच वृद्धि गर्न महत्वपूर्ण योगदान पुगेको छ।
