पोखरिया । पर्साको पोखरिया नगरपालिका–४ मा रहेको प्रादेशिक अस्पताल पोखरियाको विकास समिति अध्यक्षमा उमेश प्रसाद चौहानले बिहिवार एक कार्यक्रमका बीच औपचारिक रूपमा पदभार ग्रहण गरेका छन्।
स्वास्थ्य तथा जनसंख्या मन्त्रालय, जनकपुरधाम धनुषाद्वारा २०८२ साउन २० गते जारी परिपत्र अनुसार उनलाई पुनः अध्यक्ष पदमा मनोनीत गरिएको हो। चौहान यसअघि पनि २०७२ सालमा उक्त अस्पताल विकास समितिको अध्यक्ष भइसकेका थिए।
पदभार ग्रहण कार्यक्रम प्रादेशिक अस्पताल पोखरियाका मेडिकल सुपरिटेन्डेन्ट डा. आनन्द रौनियारको अध्यक्षतामा सम्पन्न भएको थियो। कार्यक्रममा पोखरिया नगरपालिकाका नगरप्रमुख प्रदुमन प्रसाद चौहान प्रमुख अतिथि थिए। साथै, पूर्व मेडिकल सुपरिटेन्डेन्ट डा. अनिल यादव, वडा नं. १ का अध्यक्ष प्रमोद गिरी, पूर्व वडा अध्यक्ष बंका प्रसाद कुर्मी, नेपाल रेडक्रस सोसाइटी उपशाखा पोखरियाका सभापति भगवान प्रसाद कुर्मी, बृजेश द्विवेदी, सन्जु दास लगायत अस्पतालका कर्मचारीहरूको उपस्थिति रहेको थियो।
उमेश प्रसाद चौहान पोखरिया नगरपालिका–१ निवासी हुन्। उनका पिता मुक्तिनारायण चौहान पञ्चायत कालमा तीनपटक गाउँ पञ्चायत अध्यक्ष पदमा निर्वाचित भएका थिए। उनका ठुला दाजु प्रदुमन प्रसाद चौहान २०५४ सालमा गाविस अध्यक्ष, २०६४ मा संविधानसभा सदस्य तथा हाल पोखरिया नगरपालिकाका लोकप्रिय नगरप्रमुख हुन्।
