वीरगंज । जनता समाजवादी पार्टी, नेपाल (जसपा) पर्साले मधेश प्रदेशमा चर्किएको सुख्खा संकटप्रति गम्भीर चिन्ता व्यक्त गर्दै संघीय सरकार र मधेश प्रदेश सरकारलाई ११ बुँदे ध्यानाकर्षण पत्र बुझाएको छ।
पार्टीका पर्सा अध्यक्ष राम नरेश प्रसाद यादवको नेतृत्वमा गएको प्रतिनिधिमण्डलले जिल्ला प्रशासन कार्यालयमार्फत प्रधानमन्त्री र मधेश प्रदेशका मुख्यमन्त्रीलाई संयुक्त रूपमा सम्बोधन गरिएको पत्र बुझाएको हो । जसपाले सरकारको काम केवल ‘घोषणा मै सीमित’ भएको आरोप लगाएको छ ।
ध्यानाकर्षण पत्रमा भनिएको छ, “सरकारले सुख्खा संकटग्रस्त क्षेत्र घोषणा गरे पनि कुनै ठोस राहत प्याकेज, बजेट वा कार्यनीति ल्याएको छैन। सर्वसाधारणको जीवन अत्यन्तै कष्टकर बनेको छ।”
जसपा नेपालले मधेश प्रदेशका सबै आठवटा जिल्लामा एकैसाथ प्रशासन कार्यालयमार्फत ध्यानाकर्षण गराएको जनाएको छ।
जसपाले सुख्खाग्रस्त क्षेत्रमा अविलम्ब सिँचाइको व्यवस्था, किसानलाई कृषि ऋणमा छुट र मल–बीउको न्यायोचित वितरण, खानेपानी अभावग्रस्त क्षेत्रहरूमा तत्काल राहत, चुरे वन क्षेत्रको संरक्षण र भूमिगत जल पुनर्भरण योजना, बहुउद्देश्यीय जलाशय निर्माण, कृषि यन्त्रमा सहुलियत र अनुदान, चुरे दोहन गर्ने गिट्टी, बालुवा उत्खनन र क्रसर उद्योग बन्द, अधुरा सिँचाइ तथा खानेपानी योजनाहरू तत्काल सम्पन्न गरी सञ्चालनमा ल्याउने लगायतका मागहरु गरेकाे छ ।
जसपा पर्साले दाबी गरेको छ कि वर्तमान सरकार जनताको जीवनका ठोस सवालमा गम्भीर नभएको र संकटका बेलामा ‘केवल कागजी घोषणा’ गरेर पन्छिन खोजेको देखिन्छ।
ध्यानाकर्षण कार्यक्रममा वीरगञ्ज, सर्लाही, बारा, महोत्तरी, धनुषा, रौतहट, सप्तरी र सिरहा जिल्लाबाट समेत समान प्रकृतिको ज्ञापनपत्र बुझाइएको थियो । जसपाले चेतावनी दिँदै भनेको छ कि यदि सरकारका तर्फबाट तत्काल गम्भीर पहल देखिएन भने पार्टी चरणबद्ध संघर्षमा जानेछ ।
