वीरगंज । पर्सा जिल्लाको जिराभवानी गाउँपालिका–५ शंकरसरैयामा घरेलु विवादका क्रममा आफ्नै श्रीमतीको ज्यान लिएका एक पुरुष पक्राउ परेका छन् । पक्राउ पर्नेमा साेही ठाउँ निवासी ३२ वर्षीय जितेन्द्र माझी मुसहर रहेका छन् ।
प्रहरीका अनुसार पक्राउ परेका मुसहरले मादक पदार्थ सेवनको अवस्थामा श्रीमती असपतलीया देवी मुसहरमाथि हातपात तथा लाठीले घाँटीमा प्रहार गरी हत्या गरेका हुन् । घटनाबारे अस्थायी प्रहरी पोष्ट शंकरसरैयामा जानकारी मिल्ने बित्तिकै प्रहरी टोली घटनास्थलमा परिचालन गरिएको थियो ।
प्रहरीको सक्रियतामा भाग्ने प्रयासमा रहेका अभियुक्तलाई घेराबन्दी गरी नियन्त्रणमा लिइएको जिल्ला प्रहरी कार्यालय पर्साले जानकारी दिएको छ ।
साथै, इलाका प्रहरी कार्यालय पटेर्वासुगौलीबाट SoCo टोली खटाई घटनास्थलको कानुनी प्रक्रिया पूरा गरी मृतकको शव पोष्टमार्टमका लागि नारायणी अस्पताल, वीरगंज पठाइएको छ।
पक्राउ परेका मुसहरलाई कर्तव्य ज्यान मुद्दामा पर्सा जिल्ला अदालतबाट ७ दिनको म्याद थप अनुमति लिइ अनुसन्धान अघि बढाइएको पर्सा प्रहरीका प्रवक्ता तथा सूचना अधिकारी प्रहरी नायब उपरीक्षक किशोर लम्सालले जानकारी दिए ।
