वीरगंज । पर्सा जिल्लाको बिन्दवासिनी गाउँपालिका–३ झौवामा मधेश प्रदेश सरकारबाट जडान भएकाे पावरड्रिल बोरिङ जडान भएकाे छ । सिचाईकाे लागि जडान भएकाे बाेरिङकाे जनमत पार्टी पर्साका जिल्ला अध्यक्ष ओमप्रकाश सरार्फले शुक्रबार उद्घाटन गरेका छन् ।
साे अवसरमा बाेल्दै अध्यक्ष सर्राफले खडेरीको समयमा किसानका लागि यो बोरिङ सञ्जीवनी सावित हुने दाबी गरे । करिब २०० बिगाहा खेत सिँचाइ गर्न सक्ने क्षमता रहेको यो बोरिङले स्थानीय कृषकहरूको उत्पादन बढाउने र सिंचाइको दीर्घकालीन समस्या समाधान गर्ने अपेक्षा गरिएको छ । अध्यक्ष सरार्फले जनमत पार्टी सधैं किसानको पक्षमा उभिएको पार्टी भएको उल्लेख गर्दै किसान आन्दोलनको जगमै पार्टीको स्थापनाभएको स्मरण गराए ।
उद्घाटन कार्यक्रममा जनमत पार्टीकी केन्द्रीय सदस्य अनिता रौनियार, सन्तोष साह, प्रदेश सदस्य राजनारायण मिश्र, बिन्दवासिनी पालिका कमिटी अध्यक्ष विनोद (ललन) चौरसिया, वडा समिति अध्यक्ष रामबाबु चौरसिया, किसान जनमत संघका जिल्ला संयोजक विनोद कुशवाहा, वीरगंज महानगर संयोजक संजय सिंह, लोकेश कर्ण, संजय सरार्फ, देव यादव लगायत स्थानीय किसानहरूको उल्लेखनीय उपस्थिति रहेको थियो।
स्थानीय किसानहरूले यो बोरिङले सिँचाइ अभावका कारण हुने बाली नोक्सानीमा कमी ल्याउने विश्वास व्यक्त गरेका छन् । साथै, कार्यक्रमले कृषि उत्पादन वृद्धिमा सकारात्मक प्रभाव पार्ने आशा गरिएको छ ।
