वीरगंज । वीरगंज महानगरपालिकाका वडा सदस्यहरूको अगुवाइमा बिहीबार आयोजित रक्तदान कार्यक्रममा २० जनाले रक्तदान गरेका छन् ।
महानगरपालिका कार्यालयको प्रांगणमा वडा सदस्य हकहित संरक्षण समितिको आयोजनामा भएको कार्यक्रममा वडा सदस्य, नगर प्रहरी र महानगरका कर्मचारीहरुले रक्तदान गरेका हुन् ।
कार्यक्रमको उद्घाटन वीरगंज महानगर प्रमुख राजेशमान सिंहले गरेका थिए । उनले रक्तदानलाई संसारकै सबैभन्दा ठूलो पुण्यको कार्य भन्दै, गर्मीको कारण घट्दो रक्तदानप्रति चिन्ता व्यक्त गरे । मेयर सिंहले रगतकै अभावमा कसैको ज्यान जोखिममा नपरोस् भन्नका लागि प्रत्येक नागरिकले यस्ता अवसरमा रक्तदान गर्नुपर्ने आवश्यकता औँल्याए ।
हाल वीरगंजस्थित रक्त सञ्चार केन्द्रमा रगतको अभाव देखिएको छ । गर्मी बढेसँगै नियमित रक्तदान कार्यक्रमहरू घट्दै जाँदा अस्पतालमा बिरामीको उपचारमा समस्या भएको छ । यही अवस्थालाई ध्यानमा राख्दै वडा सदस्यहरूको पहलमा रक्तदान कार्यक्रम सञ्चालन गरिएको हो ।
वडा सदस्य हकहित संरक्षण समितिका अध्यक्ष शर्मा सरभंगको अध्यक्षतामा भएकाे कार्यक्रममा सामाजिक विकास महाशाखा प्रमुख प्रतिज्ञा वैद्य, शिक्षा महाशाखा प्रमुख आनन्द लामिछाने, नगर प्रहरी प्रमुख हरि भुजेल लगायतको उपस्थिति रहेको थियो ।
