वीरगंज । नेपाली समाज मलेसियाका अध्यक्ष विनोद कुमार यादवलाई जनता समाजवादी पार्टी, नेपालको विधानअनुसार प्रवास विशेष प्रदेश समितिको सदस्य पदमा मनोनयन गरिएको छ।
विगत लामो समयदेखि मलेसियामा रहेका नेपाली समुदायका हकहित, पहिचान संरक्षण तथा सामाजिक एकता निर्माणमा निरन्तर क्रियाशील रहँदै आएका यादवको समर्पण र योगदानलाई मूल्याङ्कन गर्दै पार्टीले सो पदमा मनोनयन गरेको हो।
नेपालीहरू मलेसियामा समस्यामा परेका बेला विनोद यादव स्वयम् अग्रसर भई समाधानमा जुट्दै आएका थिए । एक समर्पित अभियन्ताका रूपमा उनले प्रवासी नेपालीहरूको हितमा सक्रिय भूमिका निर्वाह गरिरहेका छन् । पार्टीको यो निर्णयले प्रवासमा रहेका नेपालीको आवाज सशक्त रूपमा उठाउने उद्देश्य बोकेको स्पष्ट देखिन्छ ।
मनोनयनको जानकारी पाएपछि आफ्नो प्रतिक्रिया व्यक्त गर्दै यादवले भने, “पार्टीले देखाएको विश्वासप्रति म आभारी छु । अब यो जिम्मेवारी केवल कागजमा होइन, काममा देखिनेछ । म विगतमा पनि प्रवासी नेपालीहरूको आवाज बनेर उभिएको थिएँ, आगामी दिनमा अझ बलियो रूपमा उभिनेछु ।”
उनको यो नियुक्तिलाई मलेसियामा रहेका नेपाली समुदायले गर्वका साथ स्वागत गरेका छन् । धेरैले सामाजिक सञ्जालमार्फत शुभकामना व्यक्त गर्दै उनलाई अझ सफल कार्यकालको शुभेच्छा दिएका छन् ।
