वीरगंज । निजी तथा आवासीय विद्यालय अर्गनाइजेशन नेपाल (प्याब्सन) पर्साद्वारा सञ्चालित संगठन विस्तार अभियानअन्तर्गत साेमबार दोस्रो दिन पर्सा जिल्लाका ठोरी गाउँपालिका, जिराभवानी गाउँपालिका, सखुवा पर्सौनी गाउँपालिका र बहुदरमाई नगरपालिकाको भ्रमण सम्पन्न भएको छ।
भ्रमण टोलीमा प्याब्सन पर्साका अध्यक्ष सरोज प्रसाद चौधरी, प्याब्सन केन्द्रीय सदस्य छेदुप लामा, मधेश प्रदेश सल्लाहकार इमामुद्धिन अहमद, तथा ठोरी गाउँपालिका फोकल पर्सन सुरेश पन्त सहभागी थिए।
भ्रमणकाे क्रममा स्थानीय निजी विद्यालयका प्रतिनिधिहरूसँग संगठनको उद्देश्य, भावी योजना र सदस्यता विस्तार सम्बन्धमा छलफल तथा संवाद गरिएको थियो । प्याब्सन अध्यक्ष चौधरीले शिक्षा क्षेत्रमा गुणस्तर र सुधार ल्याउन सशक्त संगठन निर्माण अपरिहार्य रहेको धारणा राख्दै गाउँगाउँसम्म संगठनको उपस्थिति आवश्यक रहेको बताए ।
प्याब्सन केन्द्रीय सदस्य छेदुप लामाले संगठन विस्तारलाई केन्द्रीय प्राथमिकता बताउँदै पर्साको सक्रियता अनुकरणीय भएको उल्लेख गरे । यस्तै, सल्लाहकार इमामुद्धिन अहमदले शिक्षक हित संरक्षण, नीति निर्माण र शैक्षिक मापदण्डका विषयमा मधेश प्रदेशस्तरमा एकीकृत रणनीति अवलम्बन गरिने जानकारी दिए ।
भ्रमण टोलीले सम्बद्ध पालिकामा पालिकास्तरीय प्याब्सन समिति गठन प्रक्रिया तीव्र बनाउने प्रतिबद्धता जनाएको छ ।
प्याब्सन पर्साले सञ्चालनमा ल्याएको यो अभियानले सम्पूर्ण पालिकामा संगठन विस्तार, सदस्यता अभिवृद्धि, र शिक्षा क्षेत्रको चुनौती समाधानका लागि साझा साझेदारीको प्रयासलाई तीव्रता दिएको छ । अभियानअन्तर्गत अन्य पालिकाहरूमा पनि क्रमिक रूपमा भ्रमण गरिने जनाइएको छ ।
