वीरगंज । संयुक्त बाम अभियान पर्साको आयोजनामा शनिबार वीरगंजको घण्टाघरमा अमेरिकाले प्यालेस्टाइनमाथि गरेको आक्रमणको विरोधमा प्लेकार्डसहित विरोध प्रदर्शन गरिएको छ ।
विरोध प्रदर्शनमा सहभागीहरूले “अमेरिकी साम्राज्यवाद–मूर्दावाद”, “इजरायली फासिवाद–मूर्दावाद”, “संयुक्त राष्ट्रसंघको बडापत्र पालना गर”, “प्यालेस्टायनी सार्वभौमिकताको रक्षा गर”, “नरसंहार बन्द गर” लगायतका नाराहरू प्लेकार्डमा लेखी प्रदर्शन गरेका थिए।
कार्यक्रमलाई सम्बोधन गर्दै नेकपा (एकीकृत समाजवादी) पर्साका अध्यक्ष बालगोपाल थापाले प्यालेस्टाइनमाथिको आक्रमण तत्काल बन्द गर्न माग गर्दै भने, “प्यालेस्टाइनी जनता बाँच्न पाउनुपर्छ, विश्व शान्ति कायम हुनु पर्छ।”
प्रदर्शन कार्यक्रममा नेकपा माओवादी केन्द्रका वैकल्पिक केन्द्रीय सदस्य बाबुराम कौशिक, पूर्व जिल्ला संयोजक रामदरश कुशवाहा, महमद सलाम, एकीकृत समाजवादीका नेता किशोरी कुशवाहा, बृजलाल पासवान, राष्ट्रिय जनमोर्चाका अच्छेलाल साह, हिमालचन्द्र गौतम, वैज्ञानिक समाजवादी कम्युनिस्ट पार्टीका धनबहादुर श्रेष्ठ लगायतको सहभागिता रहेको थियो ।
संयुक्त बाम अभियान पर्साले साम्राज्यवादी हस्तक्षेप र युद्धविरोधी धारणा सार्वजनिक गर्दै अन्तर्राष्ट्रिय न्याय र शान्तिको पक्षमा दृढ ऐक्यबद्धता प्रकट गरेको छ ।
