-ओमप्रकाश चाैधरी/
सेढवा । पर्सा जिल्लाका ग्रामीण भेगमा रहेका सामुदायिक विद्यालयहरूमा त्रैमासिक परीक्षा सकिएसँगै वर्षे बिदा सुरु भएको छ । विभिन्न स्थानीय तहहरूले आफ्ना शैक्षिक कार्यतालिकाअनुसार परीक्षा सम्पन्न गरी विद्यालय बन्द गरिरहेका छन् ।
जिराभवानी गाउँपालिकाले साउन १ गतेदेखि २० दिनका लागि विद्यालयहरू बन्द गरेको छ । पालिकाको शिक्षा शाखाले पहिलो त्रैमासिक परीक्षा सकिएपछि वर्षे बिदाको घोषणा गरेको हो ।
पटेर्वासुगौली गाउँपालिकामा पनि साउन ३ गतेसम्म परीक्षा सञ्चालन गरी साउन ४ गतेदेखि विद्यालयहरू २० दिनका लागि बन्द गरिएका छन् ।
उता सखुवाप्रसौनी गाउँपालिकाका विद्यालयहरूमा अहिले परीक्षा सञ्चालन भइरहेको छ । औराहा पंचगावास्थित दिपनारायण आदर्श नमूना विद्यालयका प्रधानाध्यापक शिवनाथ प्रसाद थारूका अनुसार परीक्षा साउन ४ गतेदेखि सुरु गरिएको हो । परीक्षा सकिएपछि साउन १३ गतेदेखि वर्षे बिदा हुने जानकारी उनले दिए ।
पर्सागढी नगरपालिकाअन्तर्गत बागवाना आधारभूत विद्यालयका प्रधानाध्यापक योगेन्द्र चौधरीले परीक्षा सोमबारदेखि सुरु भएको बताए । परीक्षा सम्पन्न भएपछि साउन १४ गतेदेखि १७ दिनको वर्षे बिदा हुने उनले जानकारी दिए ।
उनका अनुसार, गएको बैशाखमा नेपाल शिक्षक महासंघको आह्वानमा भएको आम शैक्षिक हडतालका कारण भएको शैक्षिक क्षतिको पूर्ति गर्ने गरी स्थानीय तहहरूले शैक्षिक क्यालेन्डर निर्माण गरेर विद्यालय सञ्चालन गरिरहेका छन् ।
त्यस्तै, जगरनाथपुर गाउँपालिकाअन्तर्गतका विद्यालयहरूमा बुधबारदेखि परीक्षा सञ्चालन हुने तयारी भएको छ ।
ठोरी गाउँपालिकाका विद्यालयहरूमा भने परीक्षा हालै सञ्चालनमा रहेको जनाइएको छ ।
यसरी पर्साका अधिकांश स्थानीय तहहरूले आफ्ना शैक्षिक तालिकाअनुसार त्रैमासिक परीक्षा पूरा गर्दै विद्यालयहरूमा क्रमशः वर्षे बिदा सुरु गरिरहेका छन् ।
