वीरगंज । साउन महिनाको दोस्रो सोमबारको पावन अवसरमा लायन्स क्लब अफ वीरगंज आदर्शनगरले धार्मिक आस्थाको केन्द्रको रूपमा परिचित ऐतिहासिक अलखिया मठ मन्दिर अगाडि निःशुल्क चिसो पानी वितरण गरेको छ।
साउन महिनामा सोमबारका दिन मन्दिरमा दर्शन गर्न आउने भक्तजनहरूको ठूलो भीड हुने भएकाले तिर्खाएका भक्तजनलाई सहजता र राहत पुर्याउने उद्देश्यले खानेपानी वितरण गरिएकाे क्लबले जनाएकाे छ ।
“सर्वसाधारण र दर्शनार्थीहरूलाई चिसो पानी पिउन दिनु हाम्रो सामाजिक उत्तरदायित्वको अभिव्यक्ति हो,” लायन्स क्लबका डिस्टिक एजुकेटिभ चिफ तथा समाजसेवी प्रकाश बाहेतीले बताए ।
कार्यक्रममा क्लब अध्यक्ष सुरेश रुङटाको अध्यक्षता, सचिव मनिष अग्रवाल, कोषाध्यक्ष दिपु रौनियार, सदस्य प्रदिप डालमिया, भवरलाल पारिख लगायत अन्य पदाधिकारी र सदस्यहरूको सक्रिय सहभागिता रहेको थियो ।
उक्त सेवामूलक कार्यले सर्वसाधारण तथा दर्शनार्थीहरूबाट सकारात्मक प्रतिक्रिया प्राप्त गरेको छ। क्लबले यस्ता सामाजिक उत्तरदायित्वमा आधारित कार्यहरू आगामी दिनमा पनि निरन्तर जारी राख्ने प्रतिबद्धता जनाएको छ ।
