बलिउड फिल्म ‘सैयारा’ ले प्रदर्शनमा आएदेखि नै दर्शक र समीक्षकको मन जित्दै चौतर्फी चर्चा बटुलिरहेको छ।
ठूला स्टार कलाकारहरू, भव्य प्रमोशन र बिदा नपरेको समयावधिमा रिलिज भए पनि फिल्मले असाधारण सफलता हात पार्दै बलिउडमा नयाँ ‘अन्डरडग सक्सेस स्टोरी’ को रूपमा उभिएको छ।
मोहित सुरीद्वारा निर्देशित र यशराज फिल्म्सको ब्यानरमा बनेको यो रोमान्टिक ड्रामा फिल्मबाट दुई नयाँ अनुहार— अहान पाण्डे र अनित पड्डा— बलिउडमा चम्किएका छन्।
२७ वर्षीय अहान पाण्डे अभिनेता चंकी पाण्डेका भाइका छोरा (अनन्या पाण्डेका भाइ) हुन्। उनले यसअघि ‘फ्रिकी अली’ र ‘द रेलवे मेन’ जस्ता फिल्ममा सहायक निर्देशकको रूपमा काम गरेका थिए। तर ‘सैयारा’ बाट उनले अभिनय यात्रा सुरु गरेका हुन्, जुन एकदमै सफल देखिएको छ।
२२ वर्षीया अनित पड्डा भने यसअघि ‘सलाम वेंकी’ मा काजोलसँग सानो भूमिका निर्वाह गरेर बलिउडमा पाइला टेकिसकेकी थिइन्। त्यसपछि उनले वेब सिरिज ‘बिग गल्र्स डन्ट क्राइ’ मा अभिनय र गायनमार्फत राम्रो चर्चा बटुलेकी थिइन्।
‘सैयारा’ मा मुख्य भूमिकाका लागि अडिसन दिएकी अनितलाई निर्देशकले तत्कालै साइन गरेका थिए। अहिले यी दुई कलाकारलाई नयाँ पुस्ताका आशाजनक र बहुपक्षीय प्रतिभा मानिएको छ।
‘आशिकी २’ र ‘एक विलेन’ जस्ता हिट प्रेमकथाका निर्देशक मोहित सुरीको यो नयाँ प्रस्तुति भारतमा ५० करोड रुपैयाँभन्दा बढीको व्यापार गरिसकेको छ। नेपालमा पनि फिल्मले दर्शकबाट राम्रो साथ पाइरहेको छ।
‘सैयारा’ को सफलता हेर्दा दर्शकहरूले भावना, कथा र अभिनयलाई प्राथमिकता दिन थालेको संकेत देखिएको छ – स्टार पावर भन्दा पनि सिनेमाको आत्मा बोल्न थालेको समय हो यो।
