काठमाडौं । उपत्यकावासीलाई मेलम्ची खानेपानी आपूर्ति प्रणालीअन्तर्गत शुद्ध र नियमित पानी उपलब्ध गराउने उद्देश्यले खानेपानीमन्त्री प्रदीप यादव आइतबार राति स्वयं फिल्डमा निस्किएर छड्के अनुगमन गरेका छन् ।
प्रधानमन्त्री निवास बालुवाटारदेखि नक्साल, टुडालदेवी, विशालनगर, वंशीधर मार्ग र सुवर्ण शम्शेर सडकसम्मका क्षेत्रमा मेलम्ची पानीको पाइपलाइन बिच्छाइएको अवस्थाबारे प्रत्यक्ष जानकारी लिन मन्त्री यादवले अनुगमन गरेका हुन् ।
मन्त्री यादवले आयोजनाको कार्यान्वयन निर्देशनालय (PID) मार्फत सम्पन्न पाइपलाइन बिच्छाइको काम चाँडै परीक्षण गरी मेलम्चीको पानी वितरण गर्न मातहतका निकायलाई स्पष्ट निर्देशन दिए ।
अनुगमनका क्रममा मन्त्री यादवले भने, “बालुवाटारलगायत क्षेत्रहरूमा पाइपलाइन बिच्छाउने कार्य सफल भएको पाइयो। अब चाँडै मेलम्चीको पानी वितरण गर्न निर्देशन दिएको छु ।”
पाइप परीक्षण (प्रेसर टेस्ट)को अन्तिम चरणमा रहेको र परीक्षण सफल भएपछि बालुवाटार, नक्साल (भाटभाटेनी पूर्व), टुडालदेवी, विशालनगर, वंशीधर मार्ग र सुवर्ण शम्शेर सडकलगायत क्षेत्रहरूमा मेलम्चीको पानी आपूर्ति सुरु गरिने आयोजनाका प्रमुख लक्ष्मी उपाध्यायले जानकारी दिए ।
पानी आपूर्तिपछि सो क्षेत्रमा करिब ३ हजार ५ सय घरधुरी प्रत्यक्ष लाभान्वित हुने अपेक्षा गरिएको छ ।
आयोजना प्रवन्धक अमित रञ्जितका अनुसार दीर्घकालीन समाधानस्वरूप मेलम्चीको पाइपलाइन बिच्छाउने कार्य सम्पन्न भइसकेको हो, जसले उपत्यकावासीलाई स्वच्छ, सुरक्षित र नियमित खानेपानी उपलब्ध गराउनेछ ।
