वीरगंज । पर्सा जिल्लाको ठोरी गाउँपालिका–५ भगवाननगरमा अवस्थित वृद्धाश्रममा आश्रित १७ जना वृद्ध–वृद्धाको सहयोगार्थ शनिबार करिब एक लाख साठी हजार रुपैयाँ बराबरको खाद्यान्न तथा अत्यावश्यक सामग्री हस्तान्तरण गरिएको छ।
लायन्स क्लब अफ वीरगंज सेन्ट्रल, लायन्स क्लब मिलेनियम एमजेएफ, संस्कृति गोल्ड र ग्रेट पीपलको संयुक्त आयोजनामा सम्पन्न सो सहयोग कार्यक्रममा संस्कृति गोल्डकी अध्यक्ष सोनी अग्रवालले वृद्धवृद्धालाई खाद्यान्न सामग्रीहरू हस्तान्तरण गरिन्।
कार्यक्रममा पूर्व डिस्टिक गभर्नर डी.एन. अग्रवाल, लायन्स सेन्ट्रलकी पूर्व अध्यक्ष मीरा खेतान, सीता अग्रवाल, कविता हालन, संगीता खेतान, मिलेनियम एमजेएफका अध्यक्ष विनोद खंडेलवाल, सचिव रोशन गुप्ता, पी.बी. शाह, उषा शाह, सुशील चाचान, सुभास अग्रवाल, अमित सर्राफ, ग्रेट पीपलका सुनील केडिया, संस्कृति गोल्डकी सदस्य सुनीता अग्रवाल, लायन्स सदस्य प्रकाश थारू, समाजसेवी, पत्रकारहरू तथा वृद्धाश्रमका व्यवस्थापकहरू सक्रिय सहभागी थिए।
लायन्सका वरिष्ठ सदस्य राधेश्याम खेतानले कार्यक्रमको उद्देश्य, सामग्रीहरूको विवरण र वृद्धाश्रमप्रतिको सामाजिक उत्तरदायित्वबारे विस्तृत जानकारी दिएका थिए।
कार्यक्रममार्फत वृद्धाश्रममा बसोबास गरिरहेका बासिन्दाहरूलाई दाल–चामल, तेल, नुन, चिनी, मसला लगायत दैनिक उपभोग्य सामग्रीहरू प्रदान गरिएको आयोजकहरूले जनाएका छन्।
उक्त सहयोगले वृद्धाश्रममा बस्ने ज्येष्ठ नागरिकहरूको दैनिकी सहज बनाउन सहयोग पुग्ने विश्वास व्यक्त गरिएको छ।
