वीरगंज । संघीय सरकारका खानेपानीमन्त्री प्रदीप यादवले देशका कुनै पनि समुदाय विकासको मूलधारबाट पछि नपरोस् भन्ने सरकारको स्पष्ट नीति रहेको बताएका छन्।
शनिबार सुनसरीको झुम्कामा आयोजित “झुम्का सहरी खानेपानी तथा सरसफाइ आयोजना” को उद्घाटन कार्यक्रममा बोल्दै उनले सामाजिक न्याय र समावेशी विकासलाई केन्द्रमा राख्दै सबै समुदायलाई समान रूपमा सेवा पुर्याउनेतर्फ सरकार केन्द्रीत रहेको स्पष्ट पारे।
मन्त्री यादवले भने, “देशका हरेक नागरिकको आधारभूत अधिकार सुरक्षित खानेपानी र सरसफाइ सुनिश्चित गर्नु हाम्रो प्रमुख लक्ष्य हो। कसैलाई पनि पछाडि नपार्ने नीति सरकारको दीर्घकालीन दृष्टिकोण हो।”
उनले खानेपानी मन्त्रालयलाई सेवा–उन्मुख सामाजिक मन्त्रालयका रूपमा परिभाषित गर्दै, मन्त्रालयले सबै नागरिकसम्म स्वच्छ र सुरक्षित खानेपानी पु¥याउने योजनाअनुसार काम गरिरहेको जानकारी दिए। मन्त्री यादवका अनुसार मन्त्रालयको वित्तीय प्रगतिले ९० प्रतिशत उपलब्धि हासिल गर्नु कार्यक्षमताको दिगो सुधारको प्रमाण हो।
उक्त आयोजना मार्फत रामधुनी नगरपालिका अन्तर्गत झुम्का क्षेत्रका वडा नं. १, २, ३ र ५ का करिब २२ हजार ७८७ नागरिक तथा ४ हजार ३१ घरधुरीहरू प्रत्यक्ष लाभान्वित हुने क्षेत्रीय खानेपानी तथा ढल व्यवस्थापन आयोजना कार्यालय इटहरीका प्रमुख महेसी महतोले जानकारी गराए।
कार्यक्रममा पूर्व संघीय सांसद नवदिता चौधरी, मेयर शंकरलाल चौधरी, उपमेयर तारा थापा, प्रमुख जिल्ला अधिकारी धर्मेन्द्रकुमार मिश्र, उपभोक्ता समितिका अध्यक्ष केसीलाल चौधरी, ढल व्यवस्थापन विभागका उपमहानिर्देशक राजेन्द्र सापकोटा, आयोजना निर्देशक सुरत बम, उप–निर्देशक महेश न्यौपाने, तथा ढल निकास विराटनगरका प्रमुख सुरतलाल चौधरी लगायतको उपस्थिति थियो।
झुम्का खानेपानी आयोजनाले स्थानीय जनताको दशकौँको चाहना पूरा गर्दै क्षेत्रीय विकास र जनजीवनमा सकारात्मक प्रभाव पार्ने अपेक्षा गरिएको छ।
