वीरगंज । खानेपानीको चरम अभाव भोगिरहेका वीरगंज महानगरवासीका लागि एक सम्झाैता भएकाे छ। वीरगंज महानगरपालिका र नेपाल खानेपानी संस्थानबीच स्वच्छ, सुरक्षित र दिगो खानेपानी सेवा विस्तारका लागि एक समझदारी पत्रमा हस्ताक्षर भएको छ।
महानगर प्रमुख राजेशमान सिंहको विशेष पहल र खानेपानी मन्त्री प्रदीप यादवको सक्रियतामा सम्पन्न सो समझदारीले वीरगंजका प्रत्येक घरधुरीमा स्वच्छ खानेपानी पुर्याउने लक्ष्य राखिएकाे छ ।
समझदारी पत्रमा वीरगंज महानगरपालिकाका प्रमुख प्रशासकीय अधिकृत अरविन्द लाल कर्ण र नेपाल खानेपानी संस्थानका महाप्रबन्धक अर्जुन बाबु ढकालले हस्ताक्षर गरेका छन् ।
समझदारी अनुसार संस्थानले पाइपलाइन विस्तार, मर्मतसम्भार, नयाँ धारा जडान, जनचेतनामूलक कार्यक्रम सञ्चालन तथा गुणस्तरीय सेवा सुनिश्चित गर्नेछ । त्यस्तै, महानगरले नयाँ धारा जडानकाे सेवा शुल्क व्यवस्थापन, उपभोक्ता सहयोग तथा आर्थिक पक्षमा साथ दिनेछ।
वीरगंज महानगरपालिका क्षेत्र भित्र नेपाल खानेपानी संस्थानको खानेपानिकाे पाईपलाईन विस्तार भएका वडाहरूमा, नयाँ धारा पूर्णरूपमा नि:शुल्क जडान हुने व्यवस्था गरीएकाे मेयर सिंहले जानकारी दिए ।
दुई पक्षिय सम्झाैताकाे जलवायु परिवर्तनका कारण उत्पन्न समस्या समाधान, खानेपानीको पहुँच विस्तार, सेवा सरल, छिटो र पारदर्शी बनाउने, जनस्वास्थ्य सुधार र रोग न्यूनीकरण लगायतकाे मुख्य उद्देश्य रहेकाे वीरगंजका मेयरकाे सचिवालयले जनाएकाे छ ।
मन्त्री यादवले यो समझदारी दीर्घकालीन समाधानको आधार बन्ने विश्वास व्यक्त गर्दै भने, “अब योजना कागजमा मात्र सीमित नहुने, कार्यान्वयन प्रभावकारी हुनेछ।”
सम्झाैतामा हस्ताक्ष कार्यक्रममा खानेपाली संचालक समिति सदस्य मुकेश द्विवेदी, सलमा खातुन, वीरगंज महानगरका उप–प्रमुख इम्तियाज आलम, खानेपानी विभागका महानिर्देशक रामकुमार श्रेष्ठ, संस्थान वीरगंज शाखाका प्रमुख प्रविण साहसहित उच्चपदस्थ अधिकारी तथा जनप्रतिनिधिहरूको उपस्थिति थियो।
प्रमुख प्रशासकीय अधिकृत कर्णले भने, “यो सम्झौता वीरगंजवासीका लागि स्वच्छ खानेपानीप्रति पहुँच सुनिश्चित गर्ने दिशामा ठुलो फड्को हो।”
महाप्रबन्धक ढकालले संस्थानको तर्फबाट गुणस्तरीय सेवा दिने पूर्ण प्रतिबद्धता व्यक्त गर्दै, आवश्यक जनशक्ति वृद्धि गरिने जानकारी दिए ।
