वीरगंज । खानेपानी मन्त्री प्रदीप यादवले तराई–मधेशका जिल्लामा दिनप्रतिदिन जटिल बन्दै गएको खानेपानी संकटको तत्काल र दीर्घकालीन समाधानका लागि जलविज्ञहरूसँग बृहत छलफल गर्नुभएको छ।
खानेपानी मन्त्रालयमा मंगलबार आयोजित कार्यक्रममा पुल्चोक इन्जिनियरिङ क्याम्पसका हाइड्रोजियोलोजिस्ट विज्ञहरूको सहभागीता रहेको थियो। छलफलको उद्देश्य जलवायु परिवर्तन, भू–जलको गिरावट, चुरे दोहन, अव्यवस्थित शहरीकरण तथा जलस्रोतको खस्कँदो अवस्थाका कारण सिर्जिएको तराई–मधेशको पानी संकटलाई वैज्ञानिक दृष्टिकोणबाट विश्लेषण गर्नु रहेको मन्त्री यादवले जानकारी दिनुभयो।
मन्त्री यादवले भन्नुभयो, “वीरगञ्ज सहित मधेशका जिल्लामा पानीको संकट दिनप्रतिदिन गम्भीर बन्दै गएको छ। यसको दिगो समाधानका लागि विज्ञहरूसँगको गहिरो छलफल अत्यन्त आवश्यक भएकोले आज मन्त्रालयमै छलफल गरेका छौं।”
छलफलमा भू–जल पुनर्भरण, वर्षा पानी संकलन, हरित क्षेत्रको विस्तार, वैकल्पिक स्रोतको पहिचान र पानीको मितव्ययी प्रयोगमा प्रविधिको भूमिका लगायतका विषयहरूमा विस्तृत विचार–विमर्श भएको थियो।
खानेपानी तथा ढल व्यवस्थापन विभागका महानिर्देशक ई. रामकुमार श्रेष्ठले जलवायु परिवर्तनका कारण उत्पन्न संकटलाई सम्बोधन गर्न बहु–आयामिक उपायहरू आवश्यक रहेको उल्लेख गर्नुभयो। उहाँले चुरे क्षेत्रको दोहन, भू–जलको अत्यधिक दोहन, र जनसंख्या चापले तराई क्षेत्रमा थप दबाव सिर्जना भएको बताए।
छलफलमा सहभागी विज्ञहरूसँग एक अध्ययन टोली गठन गर्ने सहमति समेत जुटेको छ। योजना महाशाखा प्रमुख तथा सहसचिव ई. कमलराज श्रेष्ठका अनुसार सो टोलीले मधेशका जिल्लाहरूमा भू–जल संरचना, जल स्रोतको उपलब्धता, प्रदूषणको अवस्था र सम्भाव्य समाधानहरूबारे विस्तृत अध्ययन गर्नेछ।
छलफल कार्यक्रममा मन्त्रालयका सचिव ई. प्रमिलादेवी शाक्य बज्राचार्य, सहसचिव रामबाबु पुरी, मीना श्रेष्ठ, आयोजना प्रमुख सुरत बम, खानेपानी संस्थानका महाप्रवन्धक अर्जुनबाबु ढकाल, आयोजन निर्देशनालय प्रमुख लक्ष्मिप्रसाद उपाध्याय, भ्यालीबोर्ड प्रमुख सञ्जिवीक्रम राणा, तथा पुल्चोक क्याम्पसका हाइड्रोजियोलोजिस्ट विज्ञ भोला घिमिरे, देबीप्रसाद भट्टराई, प्रतापसिंह ताडब लगायतको उपस्थिति थियो।
