वीरगंज । पोखरिया नगरपालिकाको नवौं नगरसभाको दोस्रो बैठक अन्तर्गतको बन्द सत्र बिहिबार सम्पन्न भएको छ। पोखरिया नगरपालिकाकाे सभाहलमा बसेको बन्द सत्रमा उपमेयर रुबी ठाकुरले आगामी आर्थिक वर्ष २०८२/८३ का लागि कुल रु ४४ करोड ४० लाख २७ हजार रुपैयाँको बजेट प्रस्तुत गरिन् ।
बजेट प्रस्तुतिसँगै प्रत्येक वडामा विनियोजन गरिने रकमसहितको प्रस्तावमा सहभागी सदस्यहरूको सर्वसम्मत सहमतिपछि बजेट पारित गरिएको हो ।
प्रमुख प्रशासकीय अधिकृत रामविनय सिंहका अनुसार नीति तथा कार्यक्रम तथा बजेटमा शिक्षा, स्वास्थ्य, कृषि तथा पूर्वाधार विकासलाई विशेष प्राथमिकता दिइएको छ ।
पोखरिया नगरपालिकाका मेयर प्रदुमन प्रसाद चौहानको अध्यक्षतामा भएकाे कार्यक्रममा वडा अध्यक्षहरू प्रमोद गिरी, केदार प्रसाद, महेन्द्र महतो, लक्ष्मण साह कानु, शियानन्द चौहान, प्रमानन्द पटेल, नौसाद आलम, सोनालाल साह, किशोरी साह, कार्यपालिका सदस्यहरू, वडासदस्यहरू, कर्मचारी, स्थानिय पत्रकार तथा सुरक्षाकर्मीहरूको उपस्थिति रहेको थियो।
नगर प्रमुख चौहानले प्रस्तुत बजेट कार्यान्वयनमा सबैको साथ र सहयोग जरुरी रहेको बताए ।
