वीरगंज । तराई-मधेस क्षेत्रमा जलवायु परिवर्तनको प्रभावले सिर्जिएको अत्यधिक गर्मी र खडेरीका कारण पर्सा, बारा, रौतहट लगायत जिल्लाका अधिकांश चापाकलहरू सुक्दै जाँदा जनजीवन कष्टकर बन्दै गएको छ । यही अवस्था अवलोकन गर्न संघिय सरकारकाे खानेपानी मन्त्री प्रदीप यादव बुधबार गृह नगर वीरगंज आइपुगेका छन् ।
मन्त्री यादवले वीरगंज महानगर अन्तर्गतका विभिन्न वडाहरू, टोलहरू तथा प्रभावित घर–घरमा पुगेर स्थलगत निरीक्षण गर्दै नागरिकको पीडा अवलोकन गरेका छन् । उनले यस प्राकृतिक विपत्तिमा पीडितहरूप्रति गहिरो सहानुभूति प्रकट गर्दै समस्या समाधानका लागि तत्काल प्रयास थालिएको जानकारी दिएका छन् ।
हाल बारा र पर्सा जिल्लामा २३७ भन्दा बढी स्थानमा डिप बोरिङ सम्पन्न भए पनि पानीको समस्या पूर्ण रूपमा समाधान हुन नसकेको जनाउँदै यादवले भने, “तत्कालीन राहत र दीर्घकालीन समाधानका लागि हामी प्रदेश र स्थानीय सरकारसँग समन्वयमा खटिरहेका छौं।”
सांसद यादवले राष्ट्रिय तथा अन्तर्राष्ट्रिय निकायहरूलाई पनि drinking water र sanitation क्षेत्रमा सहकार्य र सहयोग गर्न हार्दिक अनुरोध गरेका छन् । उनले सबै तहको एकताबद्ध प्रयास र समन्वयबाट मात्र यो गम्भीर संकट पार गर्न सकिने विश्वास व्यक्त गरे ।
