पाेखरिया । पर्साकाे पोखरिया नगरपालिकाले चालू आर्थिक वर्ष २०८१/८२ मा करार तथा ज्यालादारीमा नियुक्त गरिएका सबै कर्मचारीहरूको नियुक्ति बदर गर्ने निर्णय गरेको छ ।
प्रमुख प्रशासकीय अधिकृत रामविनयकुमार सिंहका अनुसार, सोमबार बसेको कार्यपालिकाको बैठकले साउन १ गतेदेखि लागू हुने गरी करार तथा ज्यालादारी सेवामा कार्यरत सबै कर्मचारीलाई हटाउने निर्णय गरेको हो ।
उनले भने, “नगर प्रहरी, स्वास्थ्य संस्था, विद्यालयमा कार्यरत स्वयंसेवक शिक्षक, कार्यालय सहयोगीलगायत सबै किसिमका करार र ज्यालादारी कर्मचारीहरूलाई आगामी वर्षको सुरुवातदेखि काममा नलगाइनेछ ।”
प्रशासकीय अधिकृत सिंहले नियुक्ति बदर गरिएको अवस्थामा कसैलाई काममा खटाएमा वा हाजिर गराएमा त्यसको जिम्मेवारी सम्बन्धित शाखा वा संस्था प्रमुखले लिनुपर्ने स्पष्ट गरे ।
नगरपालिकाका कर्मचारीहरूका अनुसार चालू आर्थिक वर्षमा मात्रै ३५० भन्दा बढी कर्मचारी करार तथा ज्यालादारी सेवामा नियुक्त भएका थिए ।
नयाँ आर्थिक वर्ष २०८२/८३ को सुरुवातसँगै लागू हुने यो निर्णयले कर्मचारी व्यवस्थापन, पुनः नियुक्ति प्रक्रिया र सेवाको निरन्तरतामा कस्तो प्रभाव पर्छ भन्ने विषयमा चासो बढेको छ ।
