वीरगंज । वीरगंज महानगरपालिका–२ स्थित श्री ताराचन्द किसनलाल विद्यालयमा अध्ययनरत गरिब तथा जेहेन्दार विद्यार्थीहरूलाई विद्यालय झोला (ब्याग) वितरण गरिएको छ ।
वडाध्यक्ष महमद रेयाज मियाँको विशेष पहलमा उक्त विद्यालयका विद्यार्थीहरूलाई ब्याग वितरण गरिएको हो । कार्यक्रमका क्रममा वडाध्यक्ष मियाँले विद्यालयमा अध्ययनरत आर्थिक रूपले कमजोर र मेहनती विद्यार्थीहरूलाई शैक्षिक सामग्रीमा सहयोग गर्दै आएको जानकारी गराए ।
उनले भने, “म पनि यही विद्यालयमा अध्ययन गरेर आएको हुँ। मेरो माया यसै विद्यालयसँग गाँसिएको छ। अहिलेसम्म म सहयोग गर्दै आएको छु र आगामी दिनहरूमा पनि मेरो तर्फबाट सक्दो सहयोग गर्ने प्रतिबद्धता दोहोर्याउँछु ।”
कार्यक्रममा विद्यालयमा आवश्यक पर्ने खेलकुद सामग्रीदेखि कपी, कलम, झोला लगायत सामग्रीहरू वितरण गरिएका थिए।सो अवसरमा विद्यालयका प्रधानाध्यापकले वडाध्यक्ष मियाँलाई गम्छा ओढाएर सम्मान गरेका थिए ।
कार्यक्रममा वडा सदस्य बसिर मियाँ हजाम, अपिर महमद अंसारी, विद्यालयका शिक्षक–शिक्षिका, सामुदायिक प्रहरी, स्थानीय बासिन्दा लगायतको सहभागिता रहेको थियो।
