ओमप्रकाश चाैधरी/
सेढवा । पर्साको ठोरी गाउँपालिका–४ आठघरेमा यौन व्यवसायविरुद्ध स्थानीय महिलाहरूको समूह आन्दोलित बनेको छ । आइतबार दिउँसो एक स्थानीय होटेलमा भारतबाट आएका यौनकर्मी पुरुषहरूलाई उनीहरूले लाठी–भाटा सहित खेदाएका छन् । ती भारतीय नागरिकहरू मोटरसाइकल चढेर भाग्न सफल भएको बताइएको छ।
महिलाहरूको समूहले होटेलमा कार्यरत ४–५ जना यौनकर्मी महिलालाई भने उनीहरूको घर फर्काएका छन् । स्थानीयहरूका अनुसार ठोरी गाउँपालिका क्षेत्रका विभिन्न होटेल, रेस्टुरेन्ट तथा पसलहरूमा व्यवसायिक रूपमा यौन धन्धा सञ्चालन हुँदै आएको छ।
स्थानीयवासीहरूका अनुसार यस्ता स्थानहरूमा नेपाली तथा भारतीय नागरिकहरू नास्ता खाने बहानामा अनैतिक कार्यमा संलग्न हुँदै आएका छन्। ती ठाउँमा मादक पदार्थ सेवन, होहल्ला, गालीगलौज, र तीव्र गतिमा सवारी चलाउने घटनाहरूले समुदायमा नकारात्मक असर पारिरहेको छ।
समस्या समाधानका लागि इलाका प्रहरी कार्यालय ठोरी र अन्य सुरक्षा निकायलाई जानकारी दिइए पनि कुनै सुनुवाइ नभएको महिलाहरूको आरोप छ।
वडा नं. २, ३ र ४ का हुलाकी सडक आसपासका आकर्षक संरचनाहरूमा यौन व्यवसाय प्रवर्द्धन गर्न पहाडी जिल्लाबाट युवतीहरू ल्याउने गरिएको जानकारी पनि प्राप्त भएको छ।
स्थानीयहरूको आरोप अनुसार, होटल तथा रेस्टुरेन्ट सञ्चालन गर्न सुरक्षाकर्मीहरूलाई मासिक रूपमा रकम बुझाउने क्रमसमेत चलिरहेको छ।
समुदायमा फैलिएको असुरक्षा र सामाजिक विकृति नियन्त्रण गर्न स्थानीय महिलाहरूको यस प्रकारको सक्रियता प्रशंसनीय मानिएको छ। स्थानीयहरूले यस्ता अवैध गतिविधिहरूको स्थायी समाधानका लागि तत्काल कडा कदम चाल्न सम्बन्धित निकायसँग माग गरेका छन्।
