वीरगन्ज । भोटेकोशी र त्रिशूली नदीमा भदौ १० गते आएको विनाशकारी बाढीपछि मधेस प्रदेशका विभिन्न जिल्लाबाट प्रभावित क्षेत्रमा पुगेका २२० जनामध्ये १८० जना अझै सम्पर्कविहीन रहेका छन्। शुक्रबार सार्वजनिक विवरणअनुसार हालसम्म ३८ जना परिवार तथा आफन्तको सम्पर्कमा आएका छन् भने २ जनाको मृत्यु भएको पुष्टि भएको छ।
जिल्लागत विवरणअनुसार पर्साका ४६ जनामध्ये ३ जना सम्पर्कमा आएका छन् भने ४३ जना अझै बेपत्ता छन्। बाराका ३० जनामध्ये ४ जना सम्पर्कमा आएका, एक जनाको मृत्यु भएको र २५ जना सम्पर्कविहीन छन्।
रौतहटका २० जनामध्ये ६ जना सम्पर्कमा आएका छन् भने १४ जना अझै बेपत्ता छन्। सर्लाहीका २७ जनामध्ये ६ जना सम्पर्कमा आए पनि २१ जनाको अवस्था अज्ञात छ। महोत्तरीका १७ जनामध्ये ७ जना सम्पर्कमा आएका र १० जना अझै सम्पर्कविहीन छन्।
धनुषाका १४ जनामध्ये ७ जना सम्पर्कमा आएका छन् भने ७ जना अझै बेपत्ता छन्। सिरहाका १४ जनामध्ये २ जना सम्पर्कमा आएका र १२ जना सम्पर्कविहीन छन्।
सबैभन्दा बढी सप्तरीका ५२ जना सम्पर्कविहीन रहेको विवरण छ। त्यसमध्ये ३ जना सम्पर्कमा आएका, १ जनाको मृत्यु भएको र ४८ जना अझै सम्पर्कविहीन छन्।
यसैगरी, मधेस प्रदेशमा घर भई प्रहरी सेवामा कार्यरत १० जना प्रहरी कर्मचारीसमेत अझै सम्पर्कविहीन रहेको जनाइएको छ। पर्सा र रौतहटबाट ३–३ जना, सर्लाहीबाट ३ जना तथा धनुषा र सप्तरीबाट १–१ जना प्रहरी कर्मचारी सम्पर्कविहीन छन्।
बाढीपछि ठूलो संख्यामा मानिस सम्पर्कविहीन भएपछि परिवारजनमा चिन्ता बढेको छ। बेपत्ता व्यक्तिको खोजी, पहिचान तथा परिवारसँग सम्पर्क गराउने कार्यलाई तीव्र बनाउन सम्बन्धित निकायसँग आफन्तजनले आग्रह गरेका छन्।
