रौतहट । भारतीय कुखुरा तथा चल्लाको अवैध तस्करी रोक्न र स्थानीय बजारमा कुखुराको मासुको मूल्यमा भइरहेको अनियमितता नियन्त्रण गर्न माग गर्दै रौतहटमा एक जना किसान आमरण अनशनमा बसेका छन्।
जिल्ला कुखुरा व्यवसायी किसान संघ रौतहटका सचिव राधेश्याम साहले जिल्ला प्रशासन कार्यालय अगाडि शुक्रबारदेखि आमरण अनशन सुरु गरेका हुन्।
स्थानीय प्रशासन, सुरक्षा निकाय तथा सम्बन्धित सरकारी निकायलाई पटक–पटक लिखित तथा मौखिक रूपमा समस्या समाधानका लागि आग्रह गरे पनि सुनुवाइ नभएपछि बाध्य भएर अनशनमा बसेको साहले बताएका छन्।
संघका अनुसार खुला सीमाको फाइदा उठाउँदै भारतबाट दैनिक रूपमा अवैध रूपमा कुखुरा तथा चल्ला नेपाल भित्रिने गरेका छन्। यसका कारण स्वदेशी किसानले ठूलो लगानी गरेर उत्पादन गरेको कुखुरा बिक्री गर्न समस्या भइरहेको र कतिपय किसानको लगानीसमेत डुब्ने अवस्था आएको संघको दाबी छ।
संघले भारतीय कुखुरा तथा चल्लाको तस्करीमा प्रहरी प्रशासनकै संरक्षण रहेको आरोपसमेत लगाएको छ। यद्यपि, उक्त आरोपको स्वतन्त्र पुष्टि भएको छैन।
त्यस्तै, स्थानीय बजारमा बिचौलिया तथा केही व्यवसायीका कारण कुखुराको मासुको मूल्यमा अनियमितता र कालोबजारी भइरहेको संघको आरोप छ। किसानहरूले बजारमा मासुको उचित मूल्य निर्धारण गरी त्यसको प्रभावकारी कार्यान्वयन गर्नुपर्ने माग गरेका छन्।
संघले भारतीय कुखुरा, चल्ला तथा मासुको अवैध तस्करी पूर्ण रूपमा रोक्न, तस्करीमा संलग्न व्यक्तिमाथि कानुनी कारबाही गर्न तथा स्थानीय बजारमा कुखुराको मासुको मूल्य निर्धारण गरी कार्यान्वयन गर्न माग गरेको छ।
जिल्लाभित्रै पर्याप्त मात्रामा कुखुरा उत्पादन तथा आपूर्ति हुँदाहुँदै बाहिरबाट कुखुरा आयात हुँदा स्थानीय किसान तथा बजारमा प्रतिकूल असर परेको संघको भनाइ छ। त्यसैले जिल्लाबाहिरबाट हुने कुखुरा तथा चल्लाको आयात–निर्यातसम्बन्धी व्यवस्थासमेत पुनरावलोकन गर्न संघले माग गरेको छ।
लामो समयदेखि आफूहरूले उठाउँदै आएको समस्या समाधानप्रति सम्बन्धित निकाय गम्भीर नभएको भन्दै सचिव साहले माग पूरा नभएसम्म आमरण अनशन जारी राख्ने बताएका छन्।
