वीरगंज । वीरगंजमा सञ्चारकर्मीहरूको पेशागत दक्षता र मर्यादित पत्रकारिता प्रवर्द्धन गर्ने उद्देश्यले आयोजित तीन दिने क्षमता अभिवृद्धि तालिम आइतबार सम्पन्न भएको छ।
वीरगंज महानगरपालिकाको सहयोगमा नेपाल आजतक मिडिया प्रालिले आयोजना गरेको आम संचार माध्यमहरुमा तथा संचारकर्मीहरुकाे लागि ३ दिने क्षमता अभिवृद्धि कार्यक्रम वीरगंजस्थित बृन्दावन होटेलमा सम्पन्न भएको हो। तालिममा दुई दर्जनभन्दा बढी पत्रकारहरूको सहभागिता रहेको थियो।
समापन समारोहमा नेपाल पत्रकार महासंघका केन्द्रीय सचिव अशोक तिवारीले तालिममा सिकेका सीपलाई व्यवहारमा उतार्दै तथ्य, प्रमाण र निष्पक्षतामा आधारित पत्रकारिता गर्न आग्रह गरे। उनले पछिल्लो समय पत्रकारिता प्रतिको पाठकहरूको विश्वास घट्दै गएकाले मर्यादित पत्रकारिता अनिवार्य रहेको उल्लेख गरे।
नेपाल आजतक मिडिया प्रालिका प्रबन्ध निर्देशक विनोद पटेलको अध्यक्षतामा सम्पन्न कार्यक्रममा समाजवादी प्रेस संगठन मधेश प्रदेशका अध्यक्ष मनोज पटेल, प्रेस चौतारी मधेश प्रदेशका सचिव श्याम कुशवाहा, नेपाल पत्रकार महासंघ पर्साका कार्यसमिति सदस्य आरोहण साह लगायतको उपस्थिति रहेको थियो।
तालिममा मधेशदृष्टिका सम्पादक रामकुमार एलन र नेपाल पोस्ट मिडियाका सम्पादक मनोज पटेलले प्रशिक्षण दिएका थिए।
तालिमको उद्घाटन शुक्रबार नेपाल पत्रकार महासंघका केन्द्रीय सचिव अशोक तिवारीले नै गरेका थिए । उद्घाटन कार्यक्रममा समाजवादी प्रेस संगठन नेपालका केन्द्रीय सचिव बृजलाल पासवान, नेपाल पत्रकार महासंघ पर्साकी उपाध्यक्ष निलिमा पौडेल, केन्द्रिय परिषद सदस्य सुस्मा शर्मा लगायतको उपस्थिति रहेको थियो।
संघीयता, प्रेस स्वतन्त्रता, तथ्य–आधारित रिपोर्टिङ, र सामाजिक उत्तरदायित्वजस्ता विषयमा केन्द्रित प्रशिक्षणले सहभागीहरूलाई व्यवहारिक पत्रकारितातर्फ प्रेरित गरेको आयोजक संस्थाले जनाएको छ।
