वीरगंज । पर्सा जिल्लाको जगरनाथपुर गाउँपालिका–४ मा श्रीमानले आफ्नै श्रीमतीको घाँटी थिची हत्या गरेको घटनामा संलग्न अभियुक्तलाई प्रहरीले पक्राउ गरेको छ।
जिल्ला प्रहरी कार्यालय पर्साद्वारा जारी प्रेस विज्ञप्तिका अनुसार २०८२ असार ७ गते राति करिब १२:४५ बजे २२ वर्षीय लालबाबु खातुनको घाँटी थिची हत्या गरिएको थियो। प्रारम्भिक अनुसन्धानबाट घटनामा संलग्न मृतकका श्रीमान् सफी राज मियाँलाई पक्राउ गरिएको प्रहरीले जनाएको छ।
घटनाको जानकारी पाएलगत्तै प्रहरीको टोली घटनास्थल पुगेर अनुसन्धान थालेको थियो। मृतकको शव नारायणी अस्पताल वीरगंजमा पोस्टमार्टमका लागि पठाइएको छ।
प्रहरीले घटनाको प्रमुख कारण पति–पत्नीबीचको मनमुटाव र घरेलु विवाद रहेको प्रारम्भिक अनुसन्धानबाट खुलेको जनाएको छ। श्रीमतीले बाहिरीबाट काम गरेर घर आउदा आफूलाई बेवास्ता गरेको गुनासो गर्दै विवादमा हत्या गरेको श्रीमानले बताएका छन्।
पक्राउ परेका श्रीमानलाई पर्सा जिल्ला अदालतबाट ५ दिनको म्याद लिई थप अनुसन्धान अघि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक किशोर लम्सालले जानकारी दिए ।
