पोखरिया । पर्साकाे पोखरिया नगरपालिकाकाे वडा नं. ५ सतवरियामा मेयर प्रदुमन प्रसाद चौहान र उपमेयर रुवी कुमारी ठाकुरले संयुक्त रूपमा २ करोड ८० लाख रुपैयाँ लागतमा सडक तथा नाला निर्माणको शिलान्यास गरेका छन् ।
निर्माण कार्य अन्तर्गत कमल मुखियाको घरदेखि नहरसम्म कालोपत्र, लक्ष्मण सिंह ख्वासको घरदेखि राधाकृष्ण मन्दिरसम्म कालोपत्र, दलित बस्ती नजिक रहेको मस्जिददेखि स्ल्याब कलभर्टसम्म र मन्सुर मियाको घरदेखि नहरसम्म ग्राभेलसहितको ढलान गरिनेछ। योजना अन्तर्गत एक हजार ३ मिटर लम्बाइ र ६ मिटर चौडाइको सडक तथा ३९४ मिटर नालाको निर्माण गरिनेछ ।
शिलान्यास कार्यक्रममा बोल्दै मेयर चौहानले निर्माण कार्य स्टिमेटअनुसार गुणस्तरीय र समयमा सम्पन्न गर्न ठेकेदारलाई निर्देशन दिएका छन् । साथै, काममा लापरवाही भए कडा कारबाही हुने चेतावनी दिएका उनले स्थानीयहरूलाई समेत निगरानीमा सहयोग गर्न आग्रह गरे ।
वडा अध्यक्ष महेन्द्र महतो चाईको अध्यक्षतामा भएकाे शिलान्यास कार्यक्रममा प्रमुख प्रशासकीय अधिकृत रामविनय कुमार सिंह, इन्जिनियर सुमित प्रसाद यादव, अखिलेश प्रसाद चौरसिया, ज्ञानेन्द्र यादव, हृदयलाल साह लगायतकाे उपस्थिति रहेकाे थियो ।
