काठमाडौं । आम जनता पार्टी (आजपा) का अध्यक्ष प्रभु साहले सरकारले बजेट वितरणमा चरम असमानता देखाएको आरोप लगाउँदै प्रतिनिधिसभामा तीव्र आलोचना गरेका छन्।
बिहीबार संसदमा बोल्दै उनले सत्ता पक्षका नेताहरूको क्षेत्रमा मात्रै बजेट खन्याइएकामा आक्रोश व्यक्त गरे। “नेताजीहरूको क्षेत्रमा पूरै बजेट खन्याइयो, बाँकी सांसदहरू हेरेको हेर्यैजस्तो भयो,” साहले भने, “जनताले तिरेको कर नेताहरूको भुँडी भर्ने कामका लागि हो?”
उनले १९ खर्ब ६४ अर्ब रुपैयाँ बराबरको बजेट १६५ वटै निर्वाचन क्षेत्रमा समान रूपमा बाँडिएको भए करिब ११ अर्ब ९० करोड रुपैयाँ पर्थ्यो भन्दै अहिलेको बजेट वितरण अन्यायपूर्ण र जनविरोधी भएको बताए।
साहले सत्ता सञ्चालनमा रहेका नेताहरूलाई “चोर” को संज्ञा दिँदै देशलाई चोरतन्त्रबाट मुक्त गर्नुपर्ने आवश्यकता रहेको उल्लेख गरे। “नेता बन्नु भनेको नेपाल बेच्न हो कि चलाउन भन्ने प्रश्न अहिले उठिरहेको छ,” उनले भने।
उनले कर आतंक, व्यवसायीको समस्याहरू, जल-जंगल र नदीनालामा भइरहेको लुटतन्त्रको पनि उल्लेख गर्दै सरकार जनताको पक्षमा नभई आफ्ना नजिकका व्यक्तिहरूको स्वार्थमा चलिरहेको आरोप लगाए।
साहले सभामुखसँग संसदको गरिमालाई कायम राख्न र यस्ता असमानताका विषयमा गम्भीर ध्यान दिन आग्रह गरे। “कुशल नेतृत्व भयो भने बेइमानी हुँदैन, चोरहरूको हातबाट देशलाई मुक्त गराउन जरुरी छ,” उनले भने।
