वीरगञ्ज । दाइजोका लागि हत्या गरिएको भन्दै माइती पक्षले न्याय माग गरेका छन् भने घटनालाई आत्महत्या भनेर मिलाउन स्थानीय नेताहरू र प्रहरीले दबाब दिएको गम्भीर आरोप लगाएका छन्।
रौतहटको कटहरिया नगरपालिका–५ स्थित बजार क्षेत्रमा वैशाख २८ गते सानिया प्रवीण नामकी युवतीको हत्या गरिएको भन्दै माइती पक्षले बुधबार वीरगञ्जमा पत्रकार सम्मेलन गर्दै दोषीलाई जोगाउन ससुराली पक्ष, नेताहरू र प्रहरी मिलेको आरोप सार्वजनिक गरेका हुन्। मृतक सानियाको बिहे भारतको बिहार राज्य, पूर्वी चम्पारण सुगौली निवासी मोलाजिम रौशनसँग मुस्लिम परम्परा अनुसार भएको थियो।
सानियाका मामा अरमान अन्सारी र दाजु साहबाज रौशनले सासू, ससुरा, ज्वाइँ अरमान राय भाट मिलेर योजनाबद्ध रूपमा हत्या गरेको र अर्की भान्जीलाई पनि मार्ने धम्की दिइरहेको आरोप लगाएका छन्। उनका अनुसार केटी पक्षले दाइजोस्वरूप मागिएको नगद, केटीएम ड्युक बाइक आदि दिन नसक्दा सानियामाथि चरम मानसिक र शारीरिक यातना दिइएको थियो।
पीडित पक्षले घटनाको निष्पक्ष अनुसन्धान होस् भन्दै बारम्बार प्रहरीसमक्ष धाउँदा पनि उनीहरूको गुनासो नसुनिएको र अनुसन्धान अपारदर्शी भएको भन्दै चिन्ता व्यक्त गरेका छन्।
“हामी कसैलाई झूटो आरोप लगाउन चाहन्नौं, तर छानबिन सत्य र प्रमाणमा आधारित हुनुपर्छ,” पत्रकार सम्मेलनमा साहबाज रौशनले भने, “यो हत्या हो भन्ने कुरामा हामी विश्वस्त छौं, तर प्रहरी र नेताहरू यसलाई आत्महत्या बनाउने खेलमा लागिरहेका छन्।”
यस विषयमा हालसम्म स्थानीय प्रहरी प्रशासनले भने कुनै आधिकारिक प्रतिक्रिया दिएको छैन।
