वीरगंज । पर्साको ठोरी गाउँपालिकाले आगामी आर्थिक वर्ष २०८२/८३ का लागि कुल ५१ करोड ५४ लाख ६४ हजार ८५२ रुपैयाँ बराबरको अनुमानित बजेट सार्वजनिक गरेको छ। बुधबार ठोरी–४ स्थित घेयाङ डाँडाको गाउँपालिका कार्यालयमा आयोजित १३औं गाउँसभा अधिवेशनमा उपाध्यक्ष गोकुली कुमारी रेग्मीले आगामी वर्षको बजेट प्रस्तुत गरेकी हुन्।
बजेटमा आन्तरिक राजस्वबाट ३० लाख रुपैयाँ, संघ सरकारको अनुदानमार्फत ३२ करोड ४१ लाख, प्रदेश सरकारको अनुदानबाट १ करोड ९५ लाख, संघ सरकारबाट राजस्व बाँडफाँडतर्फ ६ करोड ९७ लाख ७२ हजार र प्रदेश सरकारबाट राजस्व बाँडफाँडबाट ७७ लाख रुपैयाँ प्राप्त हुने उल्लेख छ। साथै, सामाजिक सुरक्षा भत्ता शीर्षकमा संघ सरकारबाट ९ करोड ५० लाख रुपैयाँ आउने जनाइएको छ।
गाउँसभा अध्यक्षता गाउँपालिका अध्यक्ष लालबहादुर श्रेष्ठले गरेका थिए भने प्रमुख अतिथि जिल्ला समन्वय समिति पर्साका प्रमुख अजय साह सोनार रहेका थिए। कार्यक्रममा पाँचवटै वडाका अध्यक्ष, गाउँ कार्यपालिका सदस्यहरू, विभिन्न राजनीतिक दलका प्रतिनिधि, संघसंस्थाका प्रतिनिधि र सर्वसाधारणको समेत उपस्थिति रहेको थियो।
प्रमुख प्रशासकीय अधिकृत धर्मराज थापाले बजेटका विवरण र स्रोतबारे जानकारी गराएका थिए।
