ओमप्रकाश चाैधरी/
सेढवा । मधेश प्रदेशको पर्सा जिल्लामा अवस्थित ठोरी गाउँपालिकामा पर्यटकका लागि नयाँ आकर्षण थपिएको छ। गाउँपालिकाको वडा नं २ मा पर्ने ‘ताल खोला’ हालै आन्तरिक तथा बाह्य पर्यटकका लागि आकर्षणको केन्द्र बनेको छ।
हुलाकी सडकखण्डबाट करिब एक किलोमिटर पूर्व र इच्छानगरदेखि ४ सय मिटर जंगलभित्र रहेको यस खोलामा विशेष गरी गर्मीको मौसममा नुहाउने र रमाइलो गर्ने पर्यटकहरूको चहलपहल बढेको छ। स्थानीय व्यापारी मानबहादुर श्रेष्ठका अनुसार भारतको बेतिया, दिल्ली लगायतका सहरहरूबाट समेत पर्यटकहरू यहाँ आइपुग्ने गरेका छन्।
ताल खोलाको पानी जमिनमुनीको मुहानबाट आउने भएकाले सधैं चिसो र सफा रहन्छ। खोलाको गहिराइ करिब तीन फिट रहेको र सतहमा ढुंगा भएकाले पानीमा फोहर र हिलो हुँदैन। यिनै विशेषताका कारण यो ठाउँ पर्यटकहरूको रोजाइमा परेको हो।
नेरा मावि देउरवाना (सखुवाप्रसौनी गाउँपालिका) का शिक्षक खुमबहादुर घर्ती मगरले ताल खोलामा नुहाउँदा गर्मीमा पनि जाडो महसुस हुने अनुभव सुनाए।
ठोरी गाउँपालिका भित्र राई धारा, ठुटे खोलाको पुल, सिता गुफा, रेड हिल पार्कजस्ता अन्य थुप्रै स्थलहरूसमेत पर्यटकहरूलाई लोभ्याउँदै आएका छन्। अब ताल खोलाको थपिएसँगै ठोरीको पर्यटन सम्भावना झनै उजागर हुँदै गएको छ।
