वीरगंज । वीरगंजमा पनि विविध कार्यक्रम गरी १३६ औं अन्तर्राष्ट्रिय श्रमिक दिवस मनाइएको छ । नेपाल ट्रेड युनियन कांग्रेस पर्सा र बारा जिल्ला कार्य समितिको संयुक्त आयोजनामा बिहीबार वीरगंजमा बृहत् र्याली तथा सभाको आयोजना गरी दिवस मनाइएको हो ।
वीरगंजका घन्टाघरबाट सुरु भएको र्याली माईस्थान हुँदै आदर्शनगरबाट नगर परिक्रमा गरेर पुनः घन्टाघर चौकमा पुगेर कोणसभामा परिणत भएको थियो । र्यालीमा सहभागीहरुले ‘श्रम शक्ति नै राष्ट्र शक्ति हो’, ‘श्रमिक एकता जिन्दाबाद’, ‘श्रमको सम्मान गरौं’ लगायतका नारासहितको प्लेकार्ड बोकेका थिए ।
नेपाल ट्रेड युनियन कांग्रेस मधेश प्रदेशका अध्यक्ष विजय यादवको अध्यक्षतामा कार्यक्रम सम्पन्न भएको हो । श्रमिक विना समृद्धि सम्भव नरहेको बताउँदै अध्यक्ष यादवले सरकारले श्रमिक हितका लागि प्रभावकारी नीति ल्याउनुपर्नेमा जोड दिए । उनले संघीयता अनुसार प्रदेशस्तरीय श्रम मन्त्रालय सशक्त बनाउनुपर्ने धारणा पनि राखे ।
‘आन्तरिक रोजगारी र सामाजिक सुरक्षा हाम्रो अभियान, सामाजिक न्यायसहितको समृद्ध राष्ट्रको निर्माण’ भन्ने नाराका साथ सम्पन्न कार्यक्रममा विभिन्न श्रमिक युनियन, पेशागत संगठन, समाजसेवी तथा राजनीतिक दलका प्रतिनिधिको उपस्थिति रहेको थियो ।
