वीरगंज । भारतको पहलगाममा भएको हमलापछि भारत र पाकिस्तानबीच आपसी द्वन्द्व चलीरहेको छ । यी दुई राष्ट्रको द्वन्द्वको असर नेपाललाई पनि पर्ने निश्चित छ । एक अर्काबीच तनाब चलीरहेको बेला नेपालको नाका क्षेत्रमा पनि सुरक्षा व्यवस्था कडा पारिएको छ । जसका कारण वीरगंज–रक्सौल नाकामा पनि विशेष सतर्कता अपनाइएको छ । नेपाल र भारत दुवै देशका सुरक्षाकर्मीले सीमाक्षेत्रमा आवतजावत गर्नेहरुलाई कडाई गरेका छन् ।
भारत बिहारको पश्चिम चम्पारणको मानपुर थाना अन्तर्गत पर्ने चित्रसेनको तीनलालटेन गाउँमा अवस्थित भारतीय सिमा सुरक्षा बल (एसएसबी) क्याम्पमा दुवै देशका सीमावर्ती क्षेत्रका सीमा सुरक्षा बल प्रमुखहरुको बैठक बसेको थियो । उक्त बैठकमा नेपालका तर्फबाट पर्साका सशस्त्र प्रहरी उपरीक्षक राधेश्याम धिमाल र बाराका सशस्त्र प्रहरी उपरीक्षक खुमबहादुर केसी सहभागी थिए । भारतको तर्फबाट भने एसएसबीका ४४ र ४७ बटालियनका उच्च अधिकारी सहभागी थिए ।
उक्त बैठकमा दुवै देशका सीमा सुरक्षा बलका अधिकारीहरुबीच नेपाल–भारत सीमा नाकामा आवतजावत गर्नेहरुको चेकजाँचमा कडाई गर्ने सहमति भएको बैठकमा सहभागी पर्साका सशस्त्र प्रहरी उपरीक्षक राधेश्याम धिमालले बताए । उनले भने, ‘सीमा वारपार आवत जावत गर्नेहरुको चेकजाँचमा कडाई गर्ने सहमति भएको हो । निर्णय नै भएको चाहि होइन । उक्त सहमतिको कार्यान्वयनका लागि अहिले ट्रायल मात्र चलिरहेको छ ।’
पर्साका प्रमुख जिल्ला अधिकारी गणेश अर्यालले पनि नेपाल–भारत आवतजावत गर्नेहरुको सीमा नाकामा चेकजाँचमा कडाइ गरिएको पुष्टि गरे । नाकाबाट हुनसक्ने अवैध घुसपैठ र अनाधिकृत व्याक्तिको प्रवेशलाइ निरुत्साहित गर्न सीमानाकामा थप सतर्कता अपनाएर चेकजाँचमा कडाई गरिएको अर्यालले बताए । भारतीय समकक्षीहरुको सुचना र समन्वयमै वीरगंज नाकामा पनि अहिले चेकजाँचमा कडाई गरिएको उनले बताए । यद्यपी परिचय पत्र अनिवार्य नगरिएको स्पष्ट पार्दै उनले शंका र आवश्यक्ताको आधारमा पहिचान खुल्ने कागजपत्र भने माग गरिने जानकारी गराए ।
