वीरगंज । नेपाल औषधि तथा विक्री प्रतिनिधि संघ, बिरगंज इकाईले पनि विविध कार्यक्रम गरी १३६औं अन्तर्राष्ट्रिय श्रमिक दिवस मनाएको छ । “श्रमको सम्मान गरौँ, श्रमिकको हक अधिकार सुनिश्चित गरौँ” भन्ने नाराका साथ मोटरसाइकल र्याली निकालिएको छ ।
र्यालीले नगर परिक्रमा गर्दै वीरगंजको नारायणी अस्पतालमा पुगेर बिरामीहरुलाई फलफूल वितरण गरिएको थियो । संघका अध्यक्ष राम गोसाईले श्रमिकहरूको अधिकार सुनिश्चित गर्न संघ सधैं सशक्त रूपमा लडिरहने प्रतिबद्धता व्यक्त गरेका छन् । उनले भने, “आज पनि विभिन्न बहानामा पूँजीपतिहरूले गरिरहेकै श्रम शोषणको विरुद्ध संस्था आवाज उठाइरहनेछ ।”
त्यस्तै संस्थाका सचिव दीपेन्द्र कलवारले श्रमिकहरूलाई मजबुर नभई अधिकार प्राप्त नागरिकका रूपमा बुझ्न आग्रह गर्दै भने, “श्रमिक कसैका दास होइनन् । श्रम शोषण र श्रमिकमारा प्रवृत्तिविरुद्ध हामी निर्भीक रूपमा लडिरहनेछौँ ।”
कार्यक्रममा वीरगंज इकाईका सम्पूर्ण पदाधिकारीहरूसहित तथा सदस्यहरूको उपस्थिति रहेको थियो ।
