वीरगंज । पर्साकाे पटेर्वा सुगाैली गाउँपालिकाका पूर्व अध्यक्ष हरिनारायण चौधरीले नेकपा एमाले परित्याग गरेकाे घाेषणा गरेका छन् । पूर्व अध्यक्ष चाैधरीले एक प्रेस विज्ञप्ती जारी गर्दै एमाले परित्याग गरेकाे जानकारी गराएका छन् ।
केही नेताहरूको निहित स्वार्थमा लिप्त व्यवहार, पक्षपाती राजनीतिक गतिविधि, र अनुचित विभेदले गर्दा आफु पार्टी छाेड्न बाध्य भएकाे उनले आराेप समेत लगाएका छन् ।
उनले जारी गरेकाे विज्ञप्तीमा “यो निर्णय सहज भने छैन, तर केही नेताहरूको निहित स्वार्थमा लिप्त व्यवहार, पक्षपाती राजनीतिक गतिविधि, र अनुचित विभेदले गर्दा म निराश भएको छु । पार्टीभित्र न्याय, समानता, र पारदर्शिताको अभाव देख्दै आएको हुँदा मेरो राजनीतिक यात्रा स्वतन्त्र रूपमा अगाडि बढाउने निश्चय गरेको छु ।
एमालेका पर्सा क्षेत्र नं. ३ (क) का पूर्व क्षेत्रिय अध्यक्ष समेत रहेका चाैधरीले जारी गरेकाे प्रेस विज्ञप्ति मार्फत नै सम्पूर्ण जनसमुदाय, शुभचिन्तक, र समर्थकहरूलाई आफुले एमाले परित्याग गरेकाे जानकारी गराउन चाहन्छु उल्लेख गरेका छन् । उनले आगामी दिनहरूमा म कुनै पनि पार्टीगत दबाब वा पूर्वाग्रहबाट मुक्त रही, जनताको आवश्यकताअनुसार, सकेको सहयोग पुर्याउने प्रतिबद्धता समेत व्यक्त गरेका छन् ।
