वीरगंज । रोयल एकेडेमी वीरगंजले आफ्नाे नवौं वार्षिकोत्सव भव्य रूपमा सम्पन्न गरेको छ । बालबालिकामा सानै उमेरदेखि नै मानवता, नैतिकता र सामाजिक उत्तरदायित्वको भावना विकास गराउने उद्देश्य सहित एक कार्यक्रमकाे आयाेजना गरि विद्यालयले बार्षिकाेत्सव मनाएकाे हाे ।
बार्षिकाेत्सवकाे अवसरमा शनिबार विद्यालयले विविध सांस्कृतिक तथा शैक्षिक कार्यक्रम प्रस्तुत गर्दै बालबालिकाको सिर्जनात्मक प्रतिभा उजागर गर्ने अवसर प्रदान गरेको थियो ।
वीरगंजस्थित क्लासिक बैंक्वेटमा भएकाे कार्यक्रममा बाल कक्षा (पीजी) देखि युकेजीसम्मका विद्यार्थीहरूले “मानवताको सुरुवात आफैंबाट” भन्ने विषयवस्तुमा आधारित नाटक प्रस्तुत गरे । त्यस्तै, जातीय पहिचान झल्काउने परम्परागत भेषभूषामा सजिएका विद्यार्थीहरूले आकर्षक सांस्कृतिक नृत्य प्रदर्शन गरेका थिए ।
विद्यालयका अध्यक्ष ओम श्रेष्ठले प्रविधिको विकाससँगै व्यवहारिक शिक्षाको महत्त्व अझ बढेको बताए । उनले भने, “च्याटजीपीटी, एआई जस्ता प्रविधिहरू द्रुतगतिमा अघि बढिरहेका छन् । यस्तो अवस्थामा केवल सैद्धान्तिक ज्ञान होइन, व्यवहारिक ज्ञान र अनुभवलाई जोड दिनु आजको आवश्यकता हो ।”
विद्यालयकी प्रबन्ध निर्देशक सबनम श्रेष्ठले बालबालिकाको चौतर्फी विकास सुनिश्चित गर्न विद्यालयले अध्ययनसँगै अतिरिक्त क्रियाकलापमा जोड दिँदै आएको वताइन । उनले भनिन्, “केवल किताबी ज्ञान मात्र पर्याप्त छैन। अतिरिक्त गतिविधिमा अब्बल बनाउँदा बालबालिकाको आत्मविश्वास बढ्छ र उनीहरू आत्मनिर्भर बन्छन् ।”
विद्यालयकी प्रधानाध्यापक बिजया ओझैयाले परिवार मानवता सिक्ने पहिलो थलो भए पनि विद्यालयले यसमा महत्वपूर्ण भूमिका खेल्ने बताइन् । उनले भनिन्, “सानै उमेरदेखि विद्यार्थीलाई मानवता, नैतिकता र सामाजिक उत्तरदायित्वबारे सचेत गराउनु आवश्यक छ । यसले उनीहरूलाई भविष्यमा समाजप्रति जिम्मेवार नागरिकका रूपमा स्थापित गर्न मद्दत गर्छ ।”
कार्यक्रममा मानव सेवा आश्रमका केन्द्रीय सदस्य देवेश गुप्ता, सञ्चारकर्मी सूर्यनारायण विक, पत्रकार विमला गुप्ता, आनन्द पटेल, ग्लोबल कलेजका सहायक प्रधानाध्यापक सुमन श्रेष्ठ लगायतको उपस्थिति रहेको थियो ।
