वीरगंज । जनता समाजवादी पार्टी (जसपा) पर्साकाे शनिबार वीरगंजमा पार्टी प्रबेश कार्यक्रम सम्पन्न भएकाे छ । वीरगंजस्थित नगर सभा गृहमा भएकाे कार्यक्रममा लाेकतान्त्रिक समाजवादी पार्टी(लाेसपा)का केन्द्रीय उपाध्यक्ष एंव वीरगंजका पूर्व उपमेयर पुरुषाेत्तम लाल झा जसपामा प्रवेश गरेका हुन्।
जसपा पर्साका अध्यक्ष सिंगासन सा तेलीको अध्यक्षतामा भएको कार्यक्रममा लाेसपाका केन्द्रीय उपाध्यक्ष झासहित लाेसपाका केन्द्रीय सदस्य रेखा कर्ण, उद्योगपति भागमतलाल झा, थारु कल्याणकारिणी समाजका महासचिव विकास चाैधरीसहितका अन्य दलका सयाैं नेताकार्यकर्ता जसपामा प्रवेश गरे ।
कार्यक्रमका प्रमुख अतिथी जसपाका केन्द्रीय अध्यक्ष अशाेक राई, बिशिष्ट अतिथी जसपाका उपमहासचिव तथा खानेपानीमन्त्री प्रदीप यादव, वीरगंज महानगरका मेयर राजेशमान सिंह लगायतले झा लगायतका नव प्रबेशीहरुलाई अबीरकाे टीका लगाएर पार्टीमा स्वागत गरे ।
पार्टी प्रबेश कार्यक्रमलाई सम्बाेधन गर्दै जसपाका राष्ट्रिय अध्यक्ष अशोक राईले जसपा देशकै नम्बर १ पार्टीका रुपमा स्थापित हुने दाबी गरे । उनले भने,‘ यो पार्टीप्रति पर्सा र मधेसमात्र होइन, हिमाल, पहाड र मधेस सबैतिर जनलहर बढ्दै गएको छ । आगामी निर्वाचनबाट जसपा देशकै नम्बर १ पार्टीका रुपमा बन्नेतर्फ अग्रसर छ ।’
अहिले जसपा एमाले वा अरु कुनै ठूलो दलमा विलय हुने भनेर चलेको बजारी हल्लामा कुनै सत्यता नरहेको जिकिरपनि उनले गरे । उनले भने,‘ जसपा एमाले वा अरु कुनै पार्टीमा विलय हुन जाँदैन जसपा, बाहिर आएको भ्रममा नपर्नुहोला । यो पार्टी देशकै एक स्थापित पार्टी बन्छ, हामी बनाएर छाड्छौ ।’
मन्त्री प्रदीप यादवले अस्तित्व नै संकटमा परेका मधेस केन्द्रित दलहरु मोर्चा, सहकार्य र एकताको प्रयासमा लागेको टिप्पणी गरे । उनले मधेस र मधेसीका अधकिारका लागि नभई आफ्नो निहित स्वार्थपूर्तिका लागि उनिहरु मोर्चा र सहकार्यको प्रयासमा लागेको बताए ।
मन्त्री यादवले व्यंग्य गर्दै भने,‘ज–जसको दोकान बन्द हुन लाग्या छ ती दल नै मधेसी दलहरुबीच सकार्य, मोर्चा र एकता गराउने भनेर अहिले लागेका छन् । त्यसैका कारण उनिहरुको छलफल र अभियानमा जसपा सहभागी नभएको उनले प्रस्ट्याए ।
मेयर राजेशमान सिंहले वीरगंज महानगरसंगै पर्सा जिल्लामै जसपा थप बलियो भएको बताए । उनले पार्टीलाई थप शक्ति प्राप्त भएको दाबी गरे । त्यसका कारण अब पर्सामा जसपाका नेताकार्यकर्ताहरु अब झन् एकजुट भएर अगाडि बढनुपर्नेमा जोड दिदैं मेयर सिंहले भने,‘ कार्यकर्ताले राखेको भरोसा प्रति नेतृत्व शतप्रतिशत उत्रिन्छौं । यदि कहिकतै कमजोरी छन् भनेपनि त्यो सुधार्न हामी तयार छौं ।’
कार्यक्रममा जसपाकी केन्द्रीय उपाध्यक्ष सुशीला श्रेष्ठ, केन्द्रीय सदस्य माेहनलाल चाैधरी, जनार्दन यादव, पूर्व प्रदेश सभा सदस्य जन्नत अन्सारी, भीमा यादव, जिल्ला समन्वय समिति पर्साका प्रमुख अजय सर्राफ, युवा नेता तबरेज अहमद, मुकेश द्विवेदी, इश्वर यादव लगायतकाकाे पनि सहभागीता थियाे ।
पार्टी प्रबेश कार्यक्रम अघि नेताहरुले सातौँ बलिदानी दिवसकाे अवसरमा वीरगंजकाे घण्टाघरमा रहेकाे शहीदहरुकाे शालिकमा माल्यार्पण गरेका थिए ।
