वीरगंज । वडा प्रहरी कार्यालय श्रीपुरले लागु औषध चरेश सहित ३ जनालाई पक्राउ गरेकाे छ । पक्राउ पर्नेमा बाराकाे सिम्रौनगढ न. वडा नं.४ हरिहरपुरका २९ बर्षिय मकसुद अन्सारी, साेही ठाउँका २० बर्षिय रामलाल सहनी र भारत विहार जिल्ला मोतीहारी थाना आदापुर सामपुर वडा नं.९ का २९ बर्षिय मुकेश कुमार रहेका छन् ।
विषेश सूचनाको आधारमा खटिएको प्रहरी टोलीले बुधबार सांझ ५:४५ बजेको समयमा वीरगंज महानगरपालिकाकाे वडा नं.१५ भिष्वा होटल अगाडी चालिस फिट्टे सडकखण्डबाट तिनै जनालाई लागु औषध सहित नियन्त्रणमा लिएकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक भारतीले जानकारी दिए ।
सो स्थानमा ना.१५ प ११५६ नम्बरको मोटरसाइकलमा सवार तिनै जनाहरुले कालो ब्याग र सेतो प्लाष्टिकको बोरा लिई संकाष्पदरूपमा बसेको अवस्थामा खटिएको प्रहरी टोलीले कानूनी रीतपुर्याई निजहरूले बोकेको ब्याग र बोरा जाँच गर्दा सो ब्याग र बोराभित्र लुकाइ छिपाई राखिएको लागु औषध चरेश जस्तो देखिने पदार्थ ४५ प्याकेटमा प्रति प्याकेट ५०० ग्रामका दरले २२ के.जी.५०० ग्राम फेला परेको प्रवक्ता भारतीले वताए ।
बरामद लागु औषध सहित निजहरूलाई नियन्त्रणमा लिइ जिल्ला प्रहरी कार्यालयमा ल्याइ निजहरू विरुद्ध लागु औषध सम्बन्धी कसूरमा थप अनुसन्धान कार्य भैरहेको जिल्ला प्रहरी कार्यालय पर्साले प्रेस विज्ञप्ती मार्फत जनाएकाे छ ।
