वीरगंज । पर्सा प्रहरीले प्रतिबन्धित लागु औषध सहित एक जनालाई पक्राउ गरेकाे छ । पक्राउ पर्नेमा वीरगंज महानगरपालिकाकाे वडा नं.२५ निवासी २३ बर्षिय राज महम्द देवान रहेका छन् ।
बिषेश सुचनाको आधारमा आइतबार राति ९:३० बजे प्रहरी चौकी गण्डकबाट खटिएको नियमित चेकिङ टोलीले वीरगंज महानगरपालिकाकाे वडा नं.१४ गण्डकचोक स्थितबाट देवानलाई पक्राउ गरेकाे हाे ।
वीरगंजबाट काठमाण्डौतर्फ जाँदै गरेका बागमति प्रदेश ०३-००१ ख २६६६ नम्बरको सार्वजनिक बसलाई रोकी चेकजाँच गर्दा देवानले सेतो बोराभित्र म्याटले फोल्ड गरेको ब्लांकेटभित्र कालो प्लाष्टिकमा लुकाइ छिपाई राखिएको नुरफिन-११९५ पिस, डाइजेपाम-१२०० पिस, फेनारगन -११८५ गरी जम्मा ३५८० एम्पुल बरामद भएकाे जिल्ला प्रहरी कार्यालय पर्साले जनाएकाे छ ।
उक्त प्रतिबन्धित लागु औषध सहित देवानलाई नियन्त्रणमा लिई उनी विरुद्ध लागु औषध सम्बन्धी कसूरमा थप अनुसन्धान भइरहेकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक भारतीले जानकारी दिए ।
