वीरगंज । राष्ट्रिय स्वतन्त्र पार्टी (रास्वपा) छिपहरमाई गाउँपालिका कमिटीको आयोजनामा पर्यावरण संरक्षण तथा हरियाली प्रवर्द्धनको उद्देश्यसहित वृक्षारोपण कार्यक्रम सम्पन्न भएको छ । कार्यक्रम छिपहरमाई गाउँपालिका–२ स्थित श्री नवगवा मावि र वडा नम्बर १ मा रहेको श्री देवी स्थान नेपाल राष्ट्रिय आधारभूत विद्यालयमा आयोजना गरिएको हो ।
वृक्षारोपण कार्यक्रमको उद्घाटन रास्वपाका क्षेत्रीय सभापति जितेन्द्र मिश्रले बिरुवा रोपेर गरेका थिए । कार्यक्रम अन्तर्गत १५० वटा मलेसियन साखु र २०० भन्दा बढी विभिन्न प्रजाती बिरुवाहरु रोपिएका छन् । रास्वपा पर्सा क्षेत्र नम्बर ४ का सभापति मिश्रले वृक्षारोपण कार्यक्रमले वातावरणीय सन्तुलन कायम राख्न महत्वपूर्ण भूमिका खेल्ने बताए । उनका अनुसार गाउँपालिकाका सबै वडाहरुमा २०० वटा बिरुवा रोप्ने लक्ष्य रहेको छ ।
वृक्षारोपण कार्यक्रममा छिपहरमाई गाउँपालिका सभापति उमेश यादवले पनि वृक्षारोपणको महत्वमा जोड दिँदै यस किसिमका कार्यक्रमले गाउँपालिकाको हरियाली बढाउने धारणा राखे । कार्यक्रममा प्रमुख अतिथि मिश्रसहित पालिका सभापति यादव, पालिका सचिव मनबोध यादव, सदस्य राजु यादव, धर्मेन्द्र यादव, विक्की यादव, श्री नवगवा माविका प्रधानाध्यापक अमीन मियाँ, शिक्षक गगन देव यादव, बिओपी इन्चार्ज प्रकाश पाण्डे लगायतको उपस्थिति रहेको थियो ।
