जनकपुरधाम । मधेश प्रदेशका मुख्यमन्त्री सतिश कुमार सिंहको नेतृत्वकाे मन्त्रीपरिषदका नवनियुक्त १० जना मन्त्री र ३ जना राज्य मन्त्रीहरूले शुक्रबार पद तथा गाेपनीयताकाे शपथ ग्रहरण गरेका छन् । नवनियुक्त मन्त्रीहरुलाई प्रदेश प्रमुख सुमित्रा सुवेदी भण्डारीले र राज्यमन्त्रीहरुलाई मुख्यमन्त्री सिंहले पद तथा गोपनीयताको शपथ ग्रहण गराएका हुन् ।
मधेश भवनको कवर्ड हलमा भएको शपथ ग्रहण कार्यक्रममा भौतिक पूर्वाधार विकासमा सरोज कुमार यादव, अर्थमा भरत प्रसाद साह, भूमि व्यवस्था, कृषि तथा सहकारीमा गोविन्द बहादुर न्यौपाने, उद्योग वाणिज्य तथा पर्यटनमा युवराज भट्टराई, शिक्षा तथा संस्कृतिमा राज कुमार लेखीले पद तथा गोपनीयताको शपथ ग्रहण गरेका थिए ।
यसैगरी स्वास्थ्य तथा जनसङ्ख्या मन्त्री शत्रुधन प्रसाद सिंह, ऊर्जा, सिँचाइ तथा खानेपानीमन्त्री बेची लूगेली, खेलकुद तथा समाज कल्याण मन्त्री प्रमोद कुमार जयसवाल, गृह, सञ्चार तथा कानून मन्त्री विमला अन्सारी र श्रम तथा यातायातमन्त्री उर्मिला चौधरीले शपथ लिएका हुन् ।
खेलकुद तथा समाज कल्याण मन्त्री बनेका जयवाल पर्साका हुन् । उनी पर्साकाे क्षेत्र नं. ३ काे (१) बाट स्वतन्त्र निर्वाचित सांसद हुन् । यस अघि उनी जसपा नेपालका सराेज कुमार यादव नेतृत्वकाे मन्त्रीमण्डलमा नेकपा एमाले प्रबेश गरी शिक्षा तथा संस्कृति मन्त्री बनेका थिए ।
शपथ ग्रहण गर्ने राज्यमन्त्रीहरूमा केशव राय स्वास्थ्य तथा जनसङ्ख्या, शारदा देवी थापा शिक्षा तथा संस्कृति र विना विभागियमा रञ्जु कुमारी मण्डल खङ्ग रहेका छन् । विस्तारित मन्त्री मण्डलमा मधेश प्रदेशमा प्रतिनिधित्व गर्ने ६ दल सहभागी छन् ।
कुन दलका कुन मन्त्री हुन् ?
नवनियुक्त मन्त्रीहरूमा नेकपा एमालेका भौतिक पूर्वाधार विकास, स्वास्थ्य तथा जनसङ्ख्या, शिक्षा तथा संस्कृति, खेलकुद तथा समाज कल्याण गरेर ४ मन्त्रालय, नेकपा माओवादी केन्द्रमा अर्थ र उद्योग वाणिज्य तथा पर्यटन, नेकपा एसमा भूमि व्यवस्था, कृषि तथा सहकारी र ऊर्जा, सिँचाइ तथा खानेपानी र एक–एक प्रदेश सभा सदस्य भएका नेपाल संघीय समाजवादी पार्टीलाई गृह, सञ्चार तथा कानून र नागरिक उन्मुक्तिलाई श्रम तथा यातायात मन्त्रालयको जिम्मेवारी दिइएको छ ।
मुख्यमन्त्री सिंहले आफूसँग मुख्यमन्त्री तथा मन्त्री परिषद्को कार्यालय र वन तथा वातावरण मन्त्रालय राखेका छन् । आजै मन्त्रीहरूले मन्त्रालय पुगेर पदभार ग्रहण समेत गरेका छन् ।
